АҚШ давлат котиби Энтони Блинкен ва Австралия ташқи ишлар вазири Марис Пейн Мьянмадаги вазият юзасидан хавотирда эканлигини билдирди ва ҳарбийларни зудлик билан давлат маслаҳатчиси Аун Сан Су Чжи ҳамда бошқа юқори мансабли амалдорларни озод қилишга чақирди, деб ёзади «Интерфакс».
«АҚШ Мьянма ҳарбийлари ҳукуматнинг бир нечта етакчиларини, шу жумладан, давлат маслаҳатчиси Аун Сан Су Чжини қўлга олгани ҳақидаги хабарлар юзасидан жиддий хавотир ва ташвиш билдиради… Биз Мьянма ҳарбий етакчиларини ҳукуматнинг барча расмий шахсларини ва фуқаролик жамияти етакчиларини озод этиб, Мьянма халқининг 8 ноябрдаги демократик сайловларда билдирган хоҳиш-истагини ҳурмат қилишга чақирамиз», — дейилади Блинкеннинг Давлат департаменти томонидан тарқатилган баёнотида.
Австралия ташқи ишлар вазири Мерис Пейн ҳам қўлга олинган юқори мансабли амалдорларни озод қилишга чақирди.
«Биз ҳарбийларни қонун устуворлигини ҳурмат қилишга, баҳсларни қонуний механизмлар орқали ҳал қилишга ҳамда ноқонуний равишда қўлга олинган барча етакчилар ва бошқа шахсларни зудлик билан озод қилишга чақирамиз», — деди Пейн.
Вазирнинг таъкидлашича, Австралия «2020 йил ноябридаги умумий сайловлар натижаларига мувофиқ Миллий мажлиснинг тинч чақириғини» қўллаб-қувватлайди.
Аввалроқ ҳарбийлар Мьянма давлат маслаҳатчиси Аун Сан Су Чжини, президент Вин Мйинни ва бошқа юқори мансабли амалдорларни қўлга олгани хабар берилган эди. Мьянма ҳарбий телевидениеси мамлакатда бир йил муддатга фавқулодда ҳолат эълон қилингани ҳақида хабар берди.
Шунингдек, давлат тўнтарилиши оқибатида мамлакатда бутун давлат ҳокимияти Мьянма Қуролли кучлари бош қўмондони Мин Аунг Хлаин қўлига ўтгани, вице-президент Мйинт Шве эса президент вазифаларини бажарувчи бўлгани ҳам маълум қилинди.
Ҳарбийлар мансабдорларнинг қўлга олинишини 2020 йил 8 ноябрда бўлиб ўтган сайловлардаги қалбакилаштиришларга жавоб деб атади.
Изоҳ (0)