Нью-Йорк суди адвокатлик бюросига собиқ президент Дональд Трамп компанияси фаолиятига оид барча ҳужжатларни штат прокурорига топширишни буюрди. Бу ҳақда «ТАСС» хабар берди.
Мазкур қарор 2020 йил март ойида Trump Organization фаолиятига қарши бошланган текширув доирасида бош прокурор Летиция Жеймс томонидан қабул қилинган. Фирма кредит олиш мақсадида ўз активларининг қийматини сунъий равишда оширганликда гумон қилиняпти. Суриштирув жараёни Трампнинг собиқ адвокати Майкл Коэннинг айбловларидан кейин бошланди. Коэн ушбу компанияда 10 йил фаолият юритган.
Суд Trump Organization манфаатларини ҳимоя қилган Morgan, Lewis and Bockius адвокатлик фирмаларига компаниянинг кўчмас мулкига оид ҳужжатларнинг бир қисмини ошкор қилишни буюрган. Ушбу материаллар 4 февралдан кечиктирмаган ҳолда Летиция Жеймсга топширилиши лозим.
Компания адвокатларининг айтишича, Демократик партия вакили бўлган Летиция Жеймснинг бу жараёнга бошчилик қилишининг сиёсий сабаблари мавжуд.
Коэн 2018 йил декабрь ойида солиқларни тўлашдан бўйин товлаш, сайловолди кампаниясини молиялаштириш қоидаларини бузиш, банк фирибгарлиги ва АҚШ молия институтларига ёлғон маълумот бериш каби кўплаб қонунбузарликлар билан айбланиб, уч йил муддатга озодликдан маҳрум қилинган.
Молиялаштириш қоидаларининг бузилиши сайловолди кампанияси учун ажратилган маблағларнинг мақсадсиз ишлатилиши билан изоҳланган. Бу пулларнинг бир қисми Трампнинг улар билан никоҳсиз яқин муносабатда бўлганини таъкидлаб келган икки аёлга сукут сақлаши учун тўланган.
Инаугурация маросимидан олдин ҳам Трамп ўзига тегишли бўлган Trump Organization’даги барча бошқарув ҳуқуқини ўғиллари Дональд ва Эрикга бергани ва ўзи у ерни тарк этганини эълон қилган. Трамп ушбу ҳаракати орқали компанияларидан воз кечмади, чунки бундай қилиш катта бойликни оиланинг бошқа аъзолари манфаатларига зарар келтирган ҳолда арзимаган нархга сотиб юборишни англатарди.
Изоҳ (0)