Қирғизистоннинг собиқ президенти Сўронбой Жээнбеков собиқ бош вазир ўринбосари Дуйшенбек Зилалиевнинг иши бўйича Бишкек шаҳар судига сўроқ қилиш учун чақирилди. Бу ҳақда собиқ амалдорнинг адвокати Таалайгул Тўқтакуновага асосланиб Tengrinews хабар берди.
«У шу йилнинг 3 февралида бўлиб ўтадиган суд мажлисига гувоҳ сифатида таклиф қилинган. Дуйшенбек Зилалиев ‘ноқонуний бойлик орттириш’ моддаси билан айбланмоқда. Бунга далилнинг бир қисми сифатида банк ячейкасидан бир миллион доллар миқдорида пул топилгани асос бўлмоқда.
Тергов Зилалиев давлат хизматчиси бўлиб туриб бунча миқдорда маблағ жамлай олмаслигини таъкидламоқда. Сўронбой Жээнбеков бу пуллар билан бевосита алоқадор, чунки у ўша вақтда президентликка номзод бўлган Сўронбой Жээнбековнинг президентлик сайлов кампаниясига мўлжалланган эди.
Менинг мижозим бу пулларни унга тўлиқ тақдим этган. Буни собиқ бош вазир Сапар Исоқов тасдиқлаши мумкин», — деган адвокат.
Адвокатнинг сўзларига кўра, Зилалиев бу ҳақда тергов жараёнида ҳам кўрсатма берган.
«Ўша пайтда Сўронбой Жээнбеков президент эди. Миллий хавфсизлик давлат қўмитаси ушбу кўрсатмага етарлича баҳо бермаган. Улар маблағ Зилалиевга тегишли деб ҳисоблашган. Аммо бу ёлғон маълумот эди. Интернетда ячейкалардан ушбу пуллар топилгани акс этган видео тарқалди, аммо кадрда ёз фасли. Зилалиев декабрь ойидаёқ ҳибсга олинганди», — дея қўшимча қилди Тўқтакунова.
Маълумот учун, бош вазирнинг собиқ ўринбосари Дуйшенбек Зилалиев 2018 йил декабрь ойида ҳибсга олинган. Пойтахтнинг Первомайский туман суди 2020 йил октябрь ойида собиқ амалдорни 9 йилга озодликдан маҳрум қилган. Ҳозирда адвокатларнинг апелляция шикояти асосида иш Бишкек шаҳар судида кўриб чиқилмоқда.
Эслатиб ўтамиз, Қирғизистон президенти Сўронбай Жээнбеков мамлакатдаги норозилик ва сиёсой инқироз шароитида 2020 йилнинг октябрь ойида истеъфога чиққан. Унинг ўрнини Садир Жапаров эгаллаган.
Изоҳ (0)