Nyu-York sudi advokatlik byurosiga sobiq prezident Donald Tramp kompaniyasi faoliyatiga oid barcha hujjatlarni shtat prokuroriga topshirishni buyurdi. Bu haqda “TASS” xabar berdi.
Mazkur qaror 2020-yil mart oyida Trump Organization faoliyatiga qarshi boshlangan tekshiruv doirasida bosh prokuror Letitsiya Jeyms tomonidan qabul qilingan. Firma kredit olish maqsadida o‘z aktivlarining qiymatini sun’iy ravishda oshirganlikda gumon qilinyapti. Surishtiruv jarayoni Trampning sobiq advokati Maykl Koenning ayblovlaridan keyin boshlandi. Koen ushbu kompaniyada 10 yil faoliyat yuritgan.
Sud Trump Organization manfaatlarini himoya qilgan Morgan, Lewis and Bockius advokatlik firmalariga kompaniyaning ko‘chmas mulkiga oid hujjatlarning bir qismini oshkor qilishni buyurgan. Ushbu materiallar 4-fevraldan kechiktirmagan holda Letitsiya Jeymsga topshirilishi lozim.
Kompaniya advokatlarining aytishicha, Demokratik partiya vakili bo‘lgan Letitsiya Jeymsning bu jarayonga boshchilik qilishining siyosiy sabablari mavjud.
Koen 2018-yil dekabr oyida soliqlarni to‘lashdan bo‘yin tovlash, saylovoldi kampaniyasini moliyalashtirish qoidalarini buzish, bank firibgarligi va AQSh moliya institutlariga yolg‘on ma’lumot berish kabi ko‘plab qonunbuzarliklar bilan ayblanib, uch yil muddatga ozodlikdan mahrum qilingan.
Moliyalashtirish qoidalarining buzilishi saylovoldi kampaniyasi uchun ajratilgan mablag‘larning maqsadsiz ishlatilishi bilan izohlangan. Bu pullarning bir qismi Trampning ular bilan nikohsiz yaqin munosabatda bo‘lganini ta’kidlab kelgan ikki ayolga sukut saqlashi uchun to‘langan.
Inauguratsiya marosimidan oldin ham Tramp o‘ziga tegishli bo‘lgan Trump Organization’dagi barcha boshqaruv huquqini o‘g‘illari Donald va Erikga bergani va o‘zi u yerni tark etganini e’lon qilgan. Tramp ushbu harakati orqali kompaniyalaridan voz kechmadi, chunki bunday qilish katta boylikni oilaning boshqa a’zolari manfaatlariga zarar keltirgan holda arzimagan narxga sotib yuborishni anglatardi.
Izoh (0)