Буюк Британия бош вазири Борис Жонсон 29 январь куни Европа комиссияси раҳбари Урсула фон дер Ляйен билан вакцинанинг Шимолий Ирландияга етказилишига қўйилган тақиққа оид вазиятни муҳокама қилди. Ушбу тақиқни жорий этиш учун Европа комиссияси «Брексит» битимидаги алоҳида моддани ишга туширган. Бу ҳақда бош вазир девонхонаси томонидан тарқатилган баёнотга таяниб, «ТАСС» хабар берди.
«Борис Жонсон Европа Иттифоқининг бугунги қадами вакциналар экспортига потенциал таъсир кўрсатиши мумкинлиги юзасидан қаттиқ хавотирда эканини билдирди», — дейди ҳукумат вакили. Аввалроқ Жонсон ушбу вазиятни Ирландия бош вазири Микал Мартин билан муҳокама қилганди.
29 январь куни Европа Иттифоқи янги турдаги коронавирусга қарши вакцинани ўз ҳудудидан иттифоққа аъзо давлатларнинг махсус рухсатисиз экспорт қилишни тақиқловчи механизмни зудлик билан маъқуллаган. Схема камида март охирига қадар амалда бўлади ва фақат ЙИ дастлабки харидлар бўйича битимлар тузган компанияларнинг дори воситалари экспортига тааллуқли.
Европа комиссиясининг аниқлик киритишича, чеклов ҳудуди Европа Иттифоқига кирадиган Шимолий Ирландияга ҳам тааллуқли ҳисобланади, «Брексит» битими шартларига кўра, Ирландия шаффоф қолиши керак.
Европа Иттифоқи ушбу имконият Буюк Британия ҳудудига вакциналар реэкспортини очиши мумкинлигидан хавотирга тушган ва форс-мажор ҳолатларида чекловларни жорий этиш учун Шимолий Ирландия тўғрисидаги протоколнинг 16-моддасини бир томонлама тартибда ишга туширган.
Изоҳ (0)