АҚШдаги спорт клублари ўйинларда COVID-19 юқтирган томошабинларни аниқлаш учун хизмат итларидан фойдаланишга босқичма-босқич тайёрланмоқда, деб хабар берди «Интерфакс».
Хусусан, «Майами Ҳит» баскетбол клуби бу борада илк қадамларни қўйган. Кейинги ҳафтада ушбу клуб уй учрашувларини томоша қилиш учун томошабинларни таклиф қилмоқда. Сўнгги ойларда баскетболчилар коронавирус пандемияси сабабли томошабинларсиз ўйин ўтказишган.
Майами жамоаси веб-сайтида таъкидланишича, бундан буён кираверишдаги барча томошабинлар ўзларини қандай ҳис қилаётгани ҳақидаги саволларга жавоб беришлари керак. Кейин улар махсус ўргатилган итларнинг ёнидан ўтиши керак бўлади. Агар ит COVID-19 инфекцияси борлигини сезса, у томошабин олдида ўтириб олади.
Бундан ташқари, клуб ўйин давомида ўзини яхши ҳис қилмаган томошабинлар учун махсус хоналар тайёрлаган.
АҚШдаги спорт ишқибозлари энди бошқа клублардан ҳам шундай чоралар кўрилишини кутмоқда. Аммо The Guardian таъкидлаганидек, мамлакат коронавирусни аниқлаш қобилиятига эга бўлган қўриқчи итларни қанча вақт ичида тайёрлай олиши аниқ эмас.
Хусусан, кўпчиликни Super Bowl – 2021 йил 7 февралда Миллий футбол лигаси (NFL) финалига шундай итларни тайёрлаш мумкинми, деган савол қизиқтиради. Ушбу американча футбол учрашуви Қўшма Штатларда йилнинг энг йирик спорт тадбирларидан бири ҳисобланади. Бу йил Флорида штатидаги стадионда атиги 22 минг томошабин бўлиши режалаштирилган, уларнинг 7,5 минг нафари коронавирусга қарши эмланган шифокорлардир. Учрашув бўлиб ўтадиган Раймонд Жеймс стадиони яна кўплаб томошабинларни қабул қилади, аммо коронавирус туфайли ташкилотчилар уларнинг сонини кескин чеклашга қарор қилди.
Хизмат итларидан COVID-19 учун «детектор» сифатида фойдаланиш сўнгги ойларда Европада фаол ўрганилмоқда.
Италия полицияси COVID-19 юқтириши мумкин бўлган одамларни аниқлаш учун итни ўргатишга олти-саккиз ҳафта вақт кераклигини маълум қилди. Ушбу усулнинг афзалликларидан бири шундаки, ит ҳеч қандай аломатлари бўлмаса ҳам, беморни тезда аниқлай олади.
Аввалроқ Финляндия аэропортида итлар коронавирусни PZR-тестлардан кўра тезроқ аниқлаётгани ҳамда Дубай аэропортида ҳам COVID-19’ни аниқлаш учун ҳарбий хизмат итларидан фойдаланаётгани тўғрисида хабар берилганди.
Изоҳ (0)