Россияда Навальний тарафдорларининг норозилик акциялари бўлиб ўтмоқда (фото)

Россиянинг Владивостокдан Петербурггача бўлган бир қатор шаҳарларида 31 январь, якшанба куни мухолифатчи Алексей Навальний тарафдорларининг норозилик акциялари бўлиб ўтмоқда. «ОВД-Инфо»нинг сўнгги маълумотларига кўра, ҳукумат томонидан рухсат берилмаган намойишларда 650 киши қўлга олинган.

Бундай митинглар ўтган якшанба куни — 23 январда ҳам Россиянинг ўнлаб шаҳарларида, шунингдек, чет элда — Австралия, Германия, Австрия, Чехия, Буюк Британия, АҚШ, Черногория ва бошқа мамлакатларда ҳам бўлиб ўтган эди. Акцияларда ўн минглаб одамлар қатнашди, уч мингдан зиёд одам қўлга олинди.

Кейинроқ Навальнийнинг тарафдорлари 31 январь куни Россиянинг 53 та шаҳрида митинглар ўтказиш ниятини маълум қилди.

Алексей Навальний 2020 йил августдан бери Германияда эди. У Томск—Москва самолётида ўзини ёмон ҳис қилгани сабабли даволаниш учун олиб кетилган. Таҳлиллар натижасига кўра, Навальний «Новичок» гуруҳидаги модда билан заҳарлангани маълум бўлди. Декабрь ойида Bellingcat ва The Insider сиёсатчини Федерал хавфсизлик хизматининг саккиз нафар ходимидан иборат махсус гуруҳ заҳарлагани таъкидланган текширув натижаларини эълон қилди.

14 январь куни Жазоларни ижро этиш федерал хизмати сиёсатчи 29 декабрь куни департамент ташаббуси билан қидирувга берилганини хабар қилди. У «Ив Роше» иши бўйича режимни бузган, унга мувофиқ Навальний ойда икки марта Жазоларни ижро этиш федерал хизмати органларига бориб, рўйхатдан ўтиши керак бўлган. Даволанишдан кейинги реабилитация рўйхатга олишга келмаслик учун асос бўлолмаслиги маълум қилинди.

Навальний 17 январь куни кечқурун Берлиндан Москвага қайтиб келди. Шереметьево аэропортида сиёсатчи «Ив Роше» иши доирасида ҳибсга олинди ва Химки шаҳридаги полиция бўлимига олиб кетилди. Химки шаҳар суди Алексей Навальнийни 15 февралга қадар қамоққа олиш бўйича ҳукм чиқарди.

28 январь куни эса Москва вилоят суди Алексей Навальнийнинг адвокатлари томонидан сиёсатчининг Москвадаги «Матросская Тишина» номли тергов изоляторидан озод қилинишини талаб қилган апелляция шикоятини рад этди. Учрашув давомида Навальний тергов изоляторидан видеоалоқа орқали нутқ сўзлади.