БАА биринчи марта чет элликларга фуқаролик олиш имкониятини тақдим этади

Бирлашган Араб Амирликлари (БАА) ҳукумати қонунга чет элликларнинг баъзи тоифаларига ушбу мамлакатда фуқаролик олиш имконини берувчи тузатишларни қабул қилди, деб ёзади «РБК» WAM агентлигига таяниб.

Унинг маълумотларига кўра, фуқароликка даъвогарларнинг аризалари ҳукумат ҳамда ижро этувчи ҳокимиятнинг маҳаллий бошқармалари томонидан кўриб чиқилади. Фуқаролик олиш усҳун, хусусан, инвесторлар, ихтирочилар, олимлар, шифокорлар, рассомлар ва уларнинг оила аъзолари даъвогарлик қилиши мумкин. Ҳар битта тоифа учун муайян талаблар белгиланган.

«Биз қонунга тузатишлар киритдик, улар БАА фуқаролигини тақдим этиш имконини беради… Янги қарор бизнинг ривожланишимизга ҳисса қўшадиган истеъдодли одамларни жалб этишга қаратилган», — деб ёзди БАА бош вазири, шайх Муҳаммад ибн Рашид Ол Мактум Twitter’да.

WAM маълумотларига қараганда, БАА фуқаролигини қўлга киритиш учун бир қанча шартларни бажариш керак:

• Инвесторлар БАА ҳудудида кўчмас мулкка эгалик қилиши ёки мамлакат Иқтисодиёт вазирлиги томонидан маъқулланадиган битта ёки бир нечта патентларни қўлга киритиши керак;
• Шифокорлар, муҳандислар ва бошқа мутахассислар ноёб ёки БАА учун ўта зарур бўлган илмий соҳада ишлаши, шунингдек, мутахассислиги бўйича камида 10 йиллик иш тажрибасига эга бўлиши керак;
• Олимлар олий таълим муассасасида, тадқиқот марказида ёки хусусий секторда фаол тадқиқотчилик фаолияти билан шуғулланиши керак. Бундан ташқари, улар камида 10 йиллик тажрибага эга бўлиши ва нуфузли илмий мукофотлар совриндори бўлиши керак;
• Ижодий касблар вакиллари маданият ва санъат соҳаси пешқадамлари бўлиши, шунингдек, халқаро мукофотлар соҳиблари бўлиши керак.