Siyosatchi Aleksey Navalniyning tarafdorlari 31-yanvar kuni Rossiyaning 53 ta shahrida mitinglar o‘tkazmoqchi. Bu haqda “Navalniy jamoasi” Telegram-kanalida e’lon qilingan aksiyalarga tayanib Meduza xabar berdi.
Foto: “Kommersant”
Moskvada siyosatchining tarafdorlari Federal xavfsizlik xizmati binosi yaqinidagi Lubyanskaya maydonida to‘planishni rejalashtirmoqda.
Rossiyaning o‘nlab hududlarida 23-yanvar kuni Navalniyni qo‘llab-quvvatlash uchun ommaviy harakatlar bo‘lib o‘tgandi. Aksariyat shaharlarda harakat minglab ishtirokchilarni hibsga olish bilan yakunlangan —mamlakat bo‘ylab jami uch yarim mingdan ortiq odam hibsga olingan.
Ayni paytda Navalniy Moskvadagi 1-raqamli tergov izolyatorida saqlanmoqda. Sud siyosatchini shartli sudlangan shaxsning xulq-atvor qoidalarini buzgan deb hisoblab, uni Federal jazoni ijro etish xizmatining talabiga binoan 30 kunga hibsga olgan va 15-fevralga qadar qamoqda bo‘lishini ma’lum qilgan. Hibsga olish to‘g‘risidagi qaror ustidan berilgan shikoyat arizasini 28-yanvar kuni ko‘rib chiqish rejalashtirilgan.
