АҚШ—Хитой муносабатлари Қўшма Штатлар учун энг муҳим, бироқ айни пайтда икки давлат тобора душманга айланиб бормоқда. Бу ҳақда АҚШнинг янги давлат котиби Энтони Блинкеннинг сўзларига таяниб «РБК» хабар берди.
«Ҳеч кимга сир эмаски, Қўшма Штатлар ва Хитой ўртасидаги муносабатлар дунёдаги энг муҳим муносабатлардир. Улар кўп жиҳатдан сиз ва биз яшайдиган келажакни шакллантиради», — деди Блинкен.
Унинг таъкидлашича, икки мамлакат ўртасидаги муносабатларда кўпинча «баъзи душманлик томонлар» юзага келади. Шунингдек, давлат котиби Вашингтон ва Пекин бир қанча соҳаларда ҳамкорликни йўлга қўяётганини таъкидлади.
АҚШ ва Хитой ўртасидаги зиддиятлар Дональд Трамп президентлиги даврида авж олди. Республикачи маъмурияти бошқарувининг дастлабки йилларида «савдо уруши» икки мамлакат ўртасидаги муносабатларнинг асосий муаммосига айланди. Натижада 2018 йилдан бери Вашингтон Хитой товарларига бир қатор божларни жорий қилди, Пекин ҳам шу тарзда жавоб қайтарди.
Шу билан бирга, Трамп даврида АҚШ Хитойни мамлакат технологияларини ўғирлашда доимий айблаб келди. Хусусан, Huawei’га шу каби айблов қўйилди. 2019 йилда у мамлакат хавфсизлигига таҳдид сифатида АҚШнинг санкциялар бўйича қора рўйхатига киритилган.
Бундан ташқари, Трамп Хитойни коронавирус пандемияси тарқалиши учун жавобгар деб бир неча бор эълон қилди. Шунингдек, собиқ президент БМТни COVID-19 пайдо бўлишида ХХРни жазолашга чақирди.
Аввалроқ АҚШ Хитой Коммунистик партияси аъзоларига нисбатан виза чекловини жорий этгани, ҳамда Дональд Трамп администрацияси Хитойнинг 10 та компаниясини «қора рўйхат»га киритгани, улар орасида Xiaomi компанияси ҳам борлиги ҳақида хабар берилганди.
Жо Байден президентлик лавозимида иш бошлаши биланоқ Хитой Трамп маъмурияти вакилларига қарши санкциялар эълон қилган. Оқ уй уларни «самарасиз» деб атаган.
Изоҳ (0)