«Узуклар ҳукмдори» оламининг нусхаси Lego’дан ясалган дунёдаги энг катта инсталляцияга айланди (видео)

20 январь куни Гиннеснинг рекордлар китобининг YouTube’даги каналида Lego конструкцияси ёрдамида яратилган энг катта иншоот видеоси пайдо бўлди. У Хитойдаги Шэньчжэнь шаҳрида жойлашган Smaerd Land болалар музейи томонидан бунёд этилган.

Видео остидаги изоҳга кўра, инсталляцияси Жон Толкиннинг «Узуклар ҳукмдори» романи ва у асосида ишланган фимларга асосланган. Инсталляцияда Ўртаердаги муҳим жойлар (Мордор, Гондор, Шир ва Рохан) ҳамда Узук жангчиларининг уруши тасвирланган.

Роликда таъкидланишича, ўлчами 191 квадрат метрга тенг инсталляцияни яратиш учун 50 нафар дизайнер ва қурувчидан иборат жамоа 3 йил давомида меҳнат қилган ва улар 150 миллион кубикдан фойдаланган.

Аввалроқ Lego «Арвоҳ овчилари» фильмидаги машҳур Cadillac конструкторини яратгани, шунингдек, ишлайдиган «подвеска»га эга Jeep Wrangler модели жамланмасини тақдим этгани тўғрисида хабар берилганди.