Американинг Огайо штатида яшовчи эр-хотин тўйининг 70 йиллигини нишонлаганидан сўнг уч ҳафта ўтиб вафот этди. Бу ҳақда People нашри хабар беради.
Маълум қилинишича, 2020 йилнинг декабрида 89 ёшли Дик Мик ва унинг рафиқаси 87 ёшли Ширли Мик ўзини ёмон ҳис қила бошлаган.
Жуфтлик 8 январь куни коронавирусни аниқлашга доир тест топширган. Натижа ижобий чиққани сабаб уларнинг ҳар иккиси бир кунда шифохонага госпитализация қилинган.
Уларнинг аҳволи тўсатдан ёмонлашгани сабаб, қариндошлар шифокорлардан эр-хотинга ҳаётининг сўнгги дақиқаларини бирга ўтказишига рухсат беришини сўрашган. 16 январь, шанба куни улар бир палатага жойлаштирилган. Кекса жуфтлик бир-бирининг қўлидан тутган ҳолда ҳаётдан кўз юмган. Ширли бошини турмуш ўртоғининг елкасига қўйган, шу вақтда палатада уларнинг севимли қўшиғи янграб турган эди. Биринчи бўлиб аёл, бир неча дақиқадан кейин эса эркак ҳаётни тарк этган.
Жуфтликнинг қариндошлари уларнинг йиллаб давом этган севги ҳикояси эртаклардагидек якун топганини маълум қилган. Дик ва Ширли 19 январь куни COVID-19’га қарши эмланиши керак бўлган, дейилади хабарда.
Изоҳ (0)