«Эпласанг, қочиб қол!»: Туркияда қўй, эчки ва қўзилар шаҳар ҳокимлиги биносига «ҳужум қилди» (видео)

Туркиянинг Невшеҳир шаҳрида қўй, эчки ва қўзилардан иборат ҳайвонлар маъмурият биносига ҳужум қилмоқчи бўлди. Бу ҳақда Daily Mail хабар берган, деб ёзади «Домашний Очаг».

Видео кузатув камерасига муҳрланган кадрларда қўйнинг бино ичига кирмоқчи бўлган эркакка ташлангани, бу вақтда унинг шериклари ҳудудни назорат қилиб турганини кўриш мумкин. Босқинчилар бу билан чекинмаган, тасодифан шу атрофдан ўтиб-кетаётган йўловчи агрессив кайфиятдаги ҳайвонлардан қочиб қутилган.

Бино ходими ҳайвонларни ҳайдаб юбормоқчи бўлган, аммо улар шунчаки ортга чекинмаган, натижада ходим бино ичига кириб олишига тўғри келган.

Қўриқчилар қутқарувчиларни чақирганидан кейин ҳайвонларнинг саргузаштларига чек қўйилган ва улар эгасига қайтарилган.

Фермер Хасан Унбуланнинг айтишича, унга қарашли қўй, эчки ва қўзилар кечаси қочиб кетган. Шундан кейин у бир неча соат давомида қидирган, аммо натижа кутилганидек бўлмаганидан кейин полицияга мурожаат қилган. Фермернинг аризаси сабаб полиция ходимлари «босқинчилар»нинг кимга қарашли эканини аниқлаш ҳамда уларни уйига қайтариб юборишга муваффақ бўлган.