Ишдан бўш вақтингизда ёки дам олиш кунлари қандай қилиб ўз яқинларингиз кўнглини олишга ўйланаётган бўлсангиз, бу рецепт айнан сиз учун. Бугун биргаликда «Аҳил оила» пирогини тайёрлаб кўрамиз!
Керакли маҳсулотлар:
- ун – 430 гр;
- сут — 190 мл;
- тухум — 1 дона;
- тухум сариғи — 1 дона;
- маргарин — 30 грамм;
- ўсимлик ёғи — 30 мл;
- хамиртуруш — 25 гр;
- шакар — 2 ош қошиқ;
- туз таъбга қараб;
- ванилин — 10 гр.
- маҳсулотларнинг ҳаммасини стол устига қўйиб оламиз;
- илиқ сутда хамиртурушни суюлтириб олиб, шакарни ва унни ҳам аралашмага қўшиб, 20 дақиқага тиндириш учун қўямиз;
- тухумни туз билан аралаштириб, тиндирилган аралашмани қўшамиз ва аралаштирамиз. Қолган маҳсулотларни ҳам бирин-кетин қўшамиз ва хамир қорамиз;
- сўнгра тайёр хамирни яна 10 дақиқага тиндириш учун қўямиз;
- хамирни кесиш осон бўлиши учун ўсимлик ёғи суртамиз (ун ишлатмаймиз) ва кичик-кичик коптокча шаклида бўлиб оламиз (тахминан 40 граммдан 19 дона коптокчалар чиқади);
- коптокчаларнинг ичини тўлдириш учун исталган начинкадан фойдаланишингиз мумкин, масалан, мурабболардан. Ва уларни тугунча қилиб ўраб оламиз;
- хамирли коптокчалар махсус пишириш қоғози солинган ёки ёғланган листга бир-бирига яқин қилиб териб чиқамиз ва печга қўямиз. 30 дақиқа давомида илиқ хона ҳароратида сақлаймиз;
- пирогнинг юқори қисмига тухумнинг сариғини суртамиз ва 20 дақиқа давомида 180 градусда пишириб оламиз. Тайёр бўлган пирогни дастурхонга тортамиз ва ўз яқинларингизни хурсанд қиламиз!
Изоҳ (0)