Витаминлар кони бўлган наъматакдан 3 та энг яхши рецепт

Наъматак − иммунитет тизимининг асосий ёрдамчиси, витамин ва микроэлементлар манбайи, тетиклик ҳамда энергияни фаоллаштирувчи хусусиятларга эга. Ўтган йиллар мобайнида ушбу ўсимлик чиндан ҳам мўъжизавий деб ҳисобланган. C ва B витаминларига бой наъматак яллиғланиш, қон босими, юрак-қон томири ва умуман, танага ижобий таъсир ўтказади.

Бундан ташқари, ўсимлик доривор хусусиятлари билан бирга, ўзига хос таъми туфайли турли хил ширинлик ва ичимликларни тайёрлашда қўл келади. Қуйида ушбу фойдали маҳсулотдан тайёрлаш мумкин бўлган 3 та рецепт билан танишинг.

Наъматакли сироп

Керакли маҳсулотлар:

• Наъматак меваси – 300 грамм;
• Шакар – 250 грамм;
• Сув – 500 мл.

Наъматак яхшилаб ювилади, попукларидан тозаланади. Тахминанб 300 мл иссиқ сувга солиб, 10 дақиқага димланади. Сироп учун қолган сувга шакар солиб қайнатилади. Аралашма қуюқлашиши керак. Димланган наъматак майдаланиб, элакдан ўтказилади ва сироп билан аралаштирилади. Ҳосил бўлган аралашма шиша идишларга солинади ва салқин жойда сақланади. Сиропни чойга қўшиб ичиш ёки соус сифатида ҳам фойдаланиш тавсия этилади. Шунингдек, ўзини истеъмол қилиш ҳам мумкин.

Наъматак ва қуритилган мевалардан компот

Керакли маҳсулотлар:

• Наъматак меваси – 200 грамм;
• Қуритилган мевалар аралашмаси – 200 грамм;
• Суюқ асал – 50 мл;
• Сув – 2 литр.

Наъматак ва қуритилган ўрик, майиз, олхўриларни ювиб, сувда қайнатиб олинади. Сўнгра паст ҳароратда 20 дақиқага қолдирилади. Сўнгра сузгичдан ўтказилиб, асал билан аралаштирилади ва бир соат мобайнида қайнатилади. Компотни иссиқ ҳолида ичиш тавсия этилади ёки совитилгандан кейин лимон шарбати қўшиш ҳам мумкин.

Наъматакли кисель

Керакли маҳсулотлар:

• Наъматак – 200 грамм;
• Шакар – 4 ош қошиқ;
• Сув – 1 литр;
• Крахмал – 2 ош қошиқ.

Наъматак ювилиб, 1 литр сувда 20 дақиқа қайнатилади. Ва 6 соатдан кам бўлмаган муддатга димланади. Тайёр бульон сузиб олинади, суюқликнинг бир қисми алоҳида идишга қуйилади ва крахмал қўшилиб, аралаштирилади. Наъматакнинг қолган қисми яна қайнатиб олинади. Шакар қўшилиб, аста-секин крахмалли аралашма солинади ва аралаштирилади. Совигандан сўнг ялпиз билан биргаликда истеъмол қилиш мумкин.