Коррупцияга қарши курашиш агентлиги Coca-Cola компаниясини хусусийлаштириш бўйича тендерни тўхтатишни талаб қилгани тўғрисида хабар берилганди. Агентлик давлат мулкини сотишда тендер савдоларини ўтказиш бўйича Давлат комиссияси томонидан етарли рақобатга имконият мавжуд эмаслиги сабабли мазкур тендер жараёнларини тўхтатиш бўйича тақдимнома киритган. Давлат активларини бошқариш агентлиги мазкур тақдимномага муносабат билдирди.
Унда айтилишича, агентликнинг компаниянинг давлат улушини сотиш жараёни қандай ташкил этилганлиги ҳақида Давлат активларини бошқариш агентлигига ва/ёки Вазирлар Маҳкамасининг тегишли фармойиши билан тузилган ишчи гуруҳга бирор-бир мурожаати келиб тушмаган.
Тақдимнома компанияни сотиш тўғрисидаги Давлат активларини бошқариш агентлигининг 2020 йил 16 декабрдаги эълонида жойлаштирилган маълумотлар асосида шакллантирилган.
Давлат активларини бошқариш агентлиги Коррупцияга қарши курашиш агентлиги ҳамда жамоатчилик билан компаниядаги давлат улушини шаффоф ва ошкора тарзда, халқаро амалиёт қоидаларига мувофиқ ҳолда сотиш жараёни юзасидан ҳамкорлик қилишга тайёрлигини билдиради.
Шу билан бирга, яқин кунларда мазкур жараённинг бевосита иштирокчилари бўлган The Coca-cola Export Corporation (АҚШ, Атланта), Rothschild & Co инвестиция банки ва Dentons юридик фирмасининг тақдимнома бўйича фикрлари жамланиб, жамоатчиликка тушунтириш берилади.
«Ушбу орқали яна бир бор жамоатчиликни ишонтириб айтамизки, Coca-Cola Ichimligi Uzbekiston Ltd МЧЖдаги давлат улушини сотиш ҳалол, очиқ ва шаффоф усулларда ҳамда дунёдаги ўзининг ўрнига эга ва номига путур етмаган халқаро компаниялар иштирокида амалга оширилмоқда», — дейилади хабарда.
Эслатиб ўтамиз, Coca-Cola корхонаси Ўзбекистонда 1-рақамли, жаҳоннинг 4 та сифат сертификатини қўлга киритган ягона, барқарор ишлаб чиқаришга эга завод ҳисобланади. Биргина 2019 йилдаги ишлаб чиқаришнинг бозордаги улуши қарийб 47 фоизни ташкил этган бўлиб, бу энг яқин рақобатчисидан 70 фоизга кўп.
Ўзбекистон Давлат активларини бошқариш агентлиги Coca-Cola Ichimligi Uzbekiston Ltd МЧЖ устав капиталидаги 57,118 фоиз улушини ошкора сотув жараёни орқали сотиш истагини 2020 йилнинг декабрь ойида эълон қилганди.
Ушбу компания давлат улушининг сотилиши бўйича кўрсатган шартлар орасида сотиб олувчи камида 7 йиллик тажрибага эга бўлиши, йиллик соф тушуми 200 миллион доллардан кам бўлмаслиги, алкоголсиз ичимликлар бўйича халқаро тажрибага эга бўлиши кабилар келтирилган. Бундай талаблар «ғолиб харидор олдиндан аниқ», деган шубҳалар пайдо қилган.
Декабрь ойида бош вазир ўринбосари Жамшид Қўчқоров Coca-Cola’нинг давлат улушини сотиб олиш учун 3 та таклиф тушганини, 70 миллион доллар беришга тайёр компания билан музокара бошланишини маълум қилганди. Январь ойи бошларида Туркиянинг Coca-Cola İçecek компанияси Coca-Cola’даги давлат улушини харид қилиш учун ариза бергани маълум бўлди.
Изоҳ (0)