Қашқадарё вилоятидаги мавжуд 1, 2, 3, 4-секторлар фаолиятига кўра яшил, сариқ ва қизил тоифага ажратилди. Бу ҳақда вилоят ҳокими Зоир Мирзаев раислигидаги аппарат йиғилишида маълум қилинди, дея хабар берди «Дарё» мухбири.
Вилоят ҳокими Зоир Мирзаевнинг маълумот беришича, натижа Давлат хизматини ривожлантириш агентлигининг 2020 йилдаги ўрганишларига асосланган бўлиб, яшил тоифага 9 та сектор, сариқ тоифага 26 та, қизил тоифага эса 25 та сектор муносиб кўрилган.
«Яшил тоифага фаолияти энг яхши деб баҳоланган Касби тумани ва Қарши шаҳрининг учинчи сектори, Косон ва Муборак туманининг иккинчи сектори, Ғузор, Косон ва Касби туманининг биринчи сектори, Косон туманининг тўртинчи сектори ва Шаҳрисабз туманининг иккинчи сектори киритилган», — деди вилоят раҳбари.
Зоир Мирзаевнинг қўшимча маълумот беришича, вилоятдаги биринчи секторлар фаолияти ўрганилганда Ғузор, Касби ва Косон туманининг биринчи секторлари фаолияти яшил тоифага киритилган, Миришкор тумани эса қизил тоифага кирган. Қолган 11 нафар ҳудуд ҳокимлари бошчилигидаги секторлар фаолияти сариқ тоифага киритилган.
Йиғилишда, шунингдек, вилоят раҳбари мавжуд биринчи сектор котибларининг қўнимсизлигини танқид қилиб, шу сабаб сектор котиблари ишининг натижасиз бўлаётганини, биринчи сектор котиблари билан шахсан учрашиб, мулоқот қилишини маълум қилган.
Изоҳ (0)