Uzbekistan Airports акциядорлик жамияти бутун жаҳон аэропортларини бирлаштирган Airports Council International (АCI) ташкилотига расман аъзо бўлди, дея хабар бермоқда ЎзА.
Таъкидланишича, ўзида 670 аъзони бирлаштирган Халқаро аэропортлар кенгаши (АCI) 176 мамлакатдаги 1 минг 979 та аэропортга хизмат кўрсатиб келмоқда. АCI, шунингдек, Халқаро ҳаво транспорти ассоциацияси (IATA), Халқаро фуқаро авиацияси ташкилоти (ICАО), Фуқаро авиациясида аэронавигация хизматини кўрсатиш ташкилоти (CANSO) билан ҳам ҳамкорлик қилиб келади.
Узбекистан Аирпорц раҳбарияти АCI билан бошланган онлайн мулоқотлар 2020 йилнинг охирларида ниҳоясига етган.
Мулоқотда Ўзбекистоннинг барча халқаро аэропортларида парвозлар хавфсизлигини таъминлаш, йўловчиларга сифатли хизмат кўрсатиш, ҳаво дарвозаларини дунё талаблари даражасида модернизация қилиш, парвозлар кўламини кенгайтириш масалаларига эътибор қаратилди. Ўзбекистон томонидан ташкилотга тақдим қилинган ҳужжатлар бир овоздан маъқулланди. Аъзолик талабларини бажариш ва галдаги вазифалар юзасидан фикрлар тингланган. Ўз навбатида келгуси режалар ҳам белгилаб олинган.
Қайд этилишича, аъзолик аввало хизматлар ишончлилигини кафолатлайди. Қолаверса, мамлакатда ҳаво транспорти тизимини тубдан ислоҳ қилиш, соҳа фаолиятини халқаро меъёрларга тенглаштириш, сайёҳликни ривожлантириш, инвестициялар оқимини жадаллаштиришда АCI хизматларига таянилади.
Аввалроқ Ўзбекистон 7 давлат билан халқаро авиақатновлар бўйича чеклов муддатини узайтиргани, Ўзбекистонда 2021 йилда авиа ва темир йўл чипталарига 30 фоиз чегирма берилиши ҳамда Ўзбекистон яна битта Boeing-787-8 самолётини харид қилиши ҳақида хабар берилганди.
Изоҳ (0)