22 январь куни Самарқанд ва Қашқадарёни боғловчи Тахтақорача довони кучли қор ёғгани сабаб ёпилгани тўғрисида хабар берилганди. ИИВ ЙҲХББ ахборот хизматининг маълум қилишича, мазкур довонда автотранспорт воситаларининг ҳаракати тикланган.

Фото: ИИВ ЙҲХББ ахборот хизмати

Таъкидланишича, йўлларни қордан тозалаш ишлари олиб борилиб, музламаларни эритиш учун қум-туз аралашмалари сепилиб зарурий чоралар кўрилган. Айни вақтда довон йўлида автотранспорт воситалари ҳаракатига рухсат берилиб, қатнов давом этмоқда.

«Ҳайдовчилардан эҳтиёткор бўлишларини, об-ҳаво ва йўл шароитини инобатга олиб транспорт воситасини бошқаришларини сўраймиз», — дейилади хабарда.

Эслатиб ўтамиз, Ўзбекистоннинг барча вилоятларида 22 январь куни қор бўрони кузатилди. ЙҲХБ ва йўлга масъул ходимлар томонидан йўлни қордан тозалаш ишларига махсус техникалар жалб этилгани тўғрисида хабар берилди.