Тошкент вилояти Бўстонлиқ туманининг тоғли ҳудудларидаги дам олиш масканига олиб борувчи йўлнинг маълум қисмида автотранспорт воситалари учун ҳаракат вақтинча бир томонлама ташкил этилди. Бу ҳақда ИИВ ЙҲХББ ахборот хизмати хабар берди.
Маълум қилинишича, тоғли ҳудудларда қор ёғганлиги муносабати билан кўплаб фуқаролар айни дам олиш кунларида Бўстонлиқ туманидаги тоғли ҳудудларида жойлашган дам олиш масканларига узлуксиз равишда ташриф буюрмоқда.
Тумандаги автомобиль йўлларининг ўтказувчанлик қобилиятини инобатга олиб, турли кўнгилсизликларнинг олдини олиш мақсадида 4Р-12 Бектемир—Чорбоғ автомобиль йўлининг 61-километридан 4Р-6 Тошкент—Чирчиқ—Чимён автомобиль йўлининг 57-километрига ўтиш қисмидан, яъни Бўстонлиқ туманининг Ғазалкент шаҳридан чиқиш жойидан то 4Р-6 автомобиль йўлининг 87-километрига — Бўстонлиқ тумани Юсуфхона аҳоли яшаш жойига қадар автомобиллар ҳаракатланиши вақтинча бир томонлама ташкил этилган.
«Ушбу ҳолатда барча ҳайдовчилардан вазиятни тўғри тушуниб, ўрнатилган йўл белгиларига риоя қилишни, хизматга жалб қилинган ЙПХ инспекторларининг ишора ва кўрсатмаларига амал қилиб ҳаракатланишни сўраб қоламиз», — дейилади хабарда.
Эслатиб ўтамиз, Янги йил арафасида ҳам Чимёнда дам олувчилар сонининг кескин ортиб кетгани сабаб тоғга кўтарилиш йўлида машиналар ҳаракати вақтинча чекланган эди.
Изоҳ (0)