Байденнинг инаугурациясини Трампникидан кўпроқ телетомошабинлар кузатди

Президент Жо Байденнинг инаугурация маросимини 40 миллионга яқин телетомошабин кузатди, деб хабар берди «Интерфакс».

Nielsen компаниясининг ҳисоб-китобларига кўра, Байденнинг қасамёдини олтита асосий телевизион янгиликлар канали орқали 39,9 миллион киши томоша қилган. 2017 йилда собиқ президент Дональд Трампнинг инаугурациясини 38,35 миллион — Байденникидан 4 фоиз кам киши кузатганди.

Инаугурация маросимларини трансляция қилган тармоқлар рейтингида CNN телеканали етакчилик қилди, ундан кейин АBC, MSNBC, NBC ва CBS.

Маълумот учун, трансляция орқали энг кўп томошабинларни Барак Обаманинг 2009 йилдаги инаугурацияси тўплаган: Nielsen агентлиги маълумотларига кўра, телетрансляцияни 37,8 миллион америкалик томоша қилган, CNN телеканалининг сайти трансляция томошабинларининг сонини 27 миллион киши деб қайд этган, яна камида 700 минг киши уни YouTube’да кўрган.

Таққослаш учун: Рональд Рейганнинг 1981 йилдаги қасамёди трансляциясини 41,8 миллион киши кўрган. Трампнинг 2016 йил ноябридаги сайловларда ғолиб чиққач сўзлаган нутқини эса 71,4 миллион киши томоша қилган.

АҚШда Президент инаугурацияси биринчи марта радио орқали 1925 йилда, Калвин Кулиж қасамёд қилаётган вақтда трансляция қилинди. Гарри Труменнинг 1949 йилдаги қасамёди телевидение орқали кўрсатилган, Жон Кеннедининг (1961 йил) қасамёди эса рангли телевидение орқали намойиш қилинган биринчиси бўлди. Билл Клинтоннинг 1997 йилдаги инаугурациясини интернет орқали тўғридан-тўғри эфирда кузатиш мумкин бўлди.

Эслатиб ўтамиз, 20 январь куни АҚШ 46-президентининг инаугурация маросими бўлиб ўтди.

Байден 2020 йилнинг ноябридаги президентлик сайловларда қайта сайланмоқчи бўлган Дональд Трампни мағлуб этди. Сайлов натижаларини бир нечта «иккиланувчи» штатлардаги овоз беришлар ҳал қилди. Трамп анча вақт судлар орқали сайлов натижаларини бекор қилишга уринди, аммо охир-оқибат бу уринишлар муваффақиятсиз бўлганини тан олди. Трамп Байденнинг инаугурациясида қатнашмади.