Японияда ҳукуматнинг саъй-ҳаракатлари билан сўнгги ўн йилликда камайган ўз жонига қасд қилиш ҳолатлари 2020 йилда, COVID-19 коронавирус пандемияси даврида яна кўпайди, деб ёзади «Интерфакс» Япония Соғлиқни сақлаш вазирлиги маълумотларига таяниб.
Хусусан, муассасанинг дастлабки маълумотларига кўра, 2020 йилда 20 919 нафар япониялик ўз жонига қасд қилган, бу 2019 йилги кўрсаткичдан 3,7 фоизга кўпдир. Бу орада, худди шу даврда расмий маълумотлар бўйича, мамлакатда 3460 киши коронавирусдан вафот этган.
Ўз жонига қасд қилиш ҳолатлари, айниқса, аёллар ва болалар ўртасида кўпайган. 2020 йилнинг саккиз ойи — ноябригача бўлган вақт ичида ўзини ўлдиришга уриниш оқибатида 300 дан ортиқ мактаб ўқувчилари вафот этган, бу 2019 йилнинг худди шу даврига қараганда 30 фоизга кўп демакдир.
ОАВлар ёзишича, Японияда ўз жонига қасд қилиш ҳолатлари 2003 йилда ўз чўққисига чиққан: тахминан 34 минг киши ўзини ўлдирган, шундан кейин ҳукумат ҳаддан зиёд кўп ишлаш оқибатидаги ўлимларга қарши чоралар кўриш ёки одамларга онлайн-маслаҳатлар орқали ёрдам бериш натижасида ўз жонига қасд қилишлар сонини пасайтиришга муваффақ бўлди.
Таъкидланишича, турли мамлакатлардаги психологлар коронавиус пандемияси ортида дунёда ўз жонига қасд қилиш даражаси ўсиши, бу, хусусан, стресс, иқтисодий ишкаллар ва оилавий муаммолар оқибатида бўлиши ҳақида аввалроқ огоҳлантирган эди.
Пандемия бошидан буён Японияда 345 мингдан ортиқ одам касалликка чалинган, беморларннг 4,7 мингдан зиёди вафот этган. 11 та префектурада фавқулодда вазият режими амал қилмоқда. Хусусан, ҳукумат бар ва ресторанлардан соат 20:00 да ёпилишни, иш берувчилардан ходимларининг 70 фоизгача қисмини уйдан ишлашга ўтказишни, одамлардан эса зарур сабабсиз уйдан чиқмасликни талаб қилмоқда. Фавқулодда вазият режими 7 февралгача амал қилади, лекин яна узайтирилиши мумкин.
Айни пайтда Японияда карантин қоидаларига риоя қилмаган шахслар ва муассасаларга нисбатан жазо чораларини жорий қилиш масаласи кўриб чиқилмоқда.
Изоҳ (0)