Қўшма Штатларга ташриф буюрувчи чет элликлардан коронавирусга топширадиган тест натижаси манфий бўлиши билан бирга карантин ҳам талаб қилинади. Бу ҳақда АҚШ президенти Жо Байден айтиб ўтган, деб ёзмоқда «РБК».
COVID-19 тарқалишига қарши кураш бўйича янги маъмуриятнинг қарорлари Оқ уй веб-сайтига жойлаштирилган 200 бетлик стратегияда баён қилинган. Ҳужжатда маъмурият ички ва халқаро саёҳатларда хавфсизлик чоралари тўғрисида махсус фармон қабул қилиши айтиб ўтилган. Ушбу қоидаларга кўра, саёҳатчилар АҚШга келгач, коронавирусга манфий тест жавобини кўрсатиши ҳамда АҚШ Касалликларни назорат қилиш ва олдини олиш марказлари тавсияларига мувофиқ карантиндан ўтиши керак.
Бундан ташқари, Оқ уй барча штатлар ҳукуматларига жамоат транспортида ниқоб тақиш режимини жорий этишни маълум қилган.
«COVID-19’ни мағлуб этиш мумкин ва биз буни уддалаймиз. Америка COVID-19 пандемиясига сиёсат билан эмас, илм-фан, асосли маълумотлар ва соғлиқни сақлаш чоралари билан жавоб қайтаради », — дейилади Оқ уй баёнотида.
Маълумотларга кўра, Байден инаугурацияси арафасида 46-президент томонидан қатор муҳим фармонлар имзоланишини эълон қилган эди. Улар орасида коронавирус тарқалишига қарши кураш чоралари ҳам бор. Президент мамлакатдаги барча давлат хизматчилари учун юз кун ниқоб тақиш режимини жорий этмоқчи, шунингдек, штатлар ҳукуматлари томонидан шунга ўхшаш чоралар кўрилишига эришмоқчи эди.
Бундан ташқари, Байден ва вице-президент Камала Харрис томонидан ишлаб чиқилган пандемияга қарши кураш режасига:
- COVID-19 тест марказларини икки баравар кўпайтириш;
- шахсий ҳимоя воситалари танқислигини бартараф этиш;
- пандемияга қарши курашиш бўйича фуқаролар ва ташкилотлар учун ягона тавсиялар яратиш;
- кекса америкаликлар ва бошқа хавф остидагилар соғлиғини ҳимоя қилиш дастурини ишлаб чиқиш киритилган.
АҚШнинг собиқ президенти Дональд Трамп мамлакатдаги карантин чораларини COVID-19’нинг ўзидан ҳам хавфлироқ деб атаган.
Изоҳ (0)