Владимир Путин Давлат Думасига президент томонидан тайинланган давлат хизматчилари ўз лавозимларида ёш чекловларисиз ишлашга рухсат берувчи қонун лойиҳасини тақдим этди, дея хабар қилмоқда Meduza.
Қонун лойиҳасига кўра, Россия президенти томонидан тайинланадиган ёки хизмат муддати узайтириладиган амалдорларга 70 ёшга тўлиши билан боғлиқ чекловлар қўлланилмайди.
Шунингдек, қонун лойиҳасида алоҳида ҳолатларда 70 ёшдан ошган мансабдор шахслар учун хизмат муддатини узайтириш таклиф этилаётгани қайд этилган.
Қайд этилишича, ҳозирда ходим 65 ёшгача ва айрим ҳолларда 70 ёшгача давлат хизматида ишлаши мумкин. Шу билан бирга, айрим ҳолларда энг тажрибали ва юқори малакали раҳбарлар учун белгиланган ёшга етганидан кейин ҳам давлат хизматининг муддатини узайтириш имкони бор.
2020 йил июль ойида Путиннинг аввалги президентлик муддатлари нолга тенглаштирадиган конституциявий ўзгаришлар амалга оширилганди. Унга кўра, Россия конституциясининг 81-моддасига тегишли ўзгартиришлар киритилди. Овоз беришда қатнашганларнинг 78 фоизи бу ўзгартиришни маъқуллаб овоз берди. Конституциянинг 81-моддаси бундан буён мамлакат президентига сайланиш муддати тугаган тақдирда қайтадан ўз номзодини президентлик сайловларида илгари суришга имкон беради. Демак, Владимир Путин 2024 йилда бўлиб ўтадиган навбатдаги сайловларда ҳам иштирок этиши мумкин бўлади.
Изоҳ (0)