Харковдаги қариялар уйида ёнғин содир бўлиши оқибатида 15 киши ҳалок бўлди

Украинанинг Харков шаҳрида 21 январь куни қариялар уйи ёниб кетди, дея хабар берди Давлат фавқулодда вазиятлар хизматига таяниб «Korrespondent.net».

«21 январь куни соат 15:03 да Харков шаҳри Нижняя Гиивська кўчасидаги қариялар уйига айлантирилган икки қаватли турар жой биносининг иккинчи қаватида ёнғин содир бўлди. Маҳаллий вақт билан соат 16:05 гача ёнғин содир бўлган жойда 15 кишининг жасади топилди. 5 киши жароҳат олгани аниқланди», дейилади хабарда.

Ёнғиннинг умумий майдони 100 квадрат метрни ташкил қилди. Уни ўчиришга 28 та шахсий таркиб ва ​​7 та техника жалб қилинган.

Ҳодиса давлат миқёсидаги фавқулодда ҳолат деб таснифланди.

Аввалроқ «Янги Ангрен» ИЭСда портлаш юз бериши оқибатида уч киши ҳалок бўлгани, Самарқандда ҳали қуриб битказилмаган хонадонда портлаш содир бўлгани ҳамда Англияда содир бўлган ёнғин оқибатида ўнлаб миллион доллар турадиган 70 та ноёб автомобиль кулга айлангани ҳақида хабар берилганди.