Twitter уйғурлар ҳақидаги твит туфайли Хитойнинг АҚШдаги элчихонаси аккаунтини блоклаб қўйди

Twitter ижтимоий тармоғи Хитойнинг АҚШдаги элчихонаси расмий аккаунтининг эгалари учун ушбу аккаунтдан фойдаланишни чеклади, деб ёзади Meduza.

Бунга Хитой ҳукуматининг сиёсати шарофати билан Шинжон-Уйғур мухтор туманидаги аёллар «бола ишлаб чиқариш машиналари» бўлишдан тўхтагани ҳақидаги твит сабабчи бўлди. Постга Хитой Коммунистик партиясининг инглиз тилидаги расмий газетаси — China Daily’да эълон қилинган тадқиқотга ҳавола илова қилинган.

Твит 7 январь куни ёзилган. Бир кун ўтиб Twitter уни бекитиб қўйди, ўрнига «Бу твитни бошқа кўриб бўлмайди» деган белги қолдирди. Twitter вакили Bloomberg’га маълум қилишича, ушбу твит ижтимоий тармоқнинг дегуманизация (инсонийликдан чиқариш)га қарши сиёсатига зиддир. У одамлар гуруҳини диний эътиқоди, ирқи ва миллати бўйича инсонийликдан чиқаришни тақиқлайди.

Twitter ижтимоий тармоқ қоидаларига зид бўлган твитларни беркитиш билан биргаликда, аккаунтнинг эгасидан уни қайта тиклаш учун твитни қўлда ўчиришни талаб қилади. Хитойнинг АҚШдаги элчихонаси твитни ўчирмади, шу сабабли Twitter ҳозирча муассаса учун аккаунтга кириш имкониятини қайта тиклагани йўқ. У 9 январдан буён янгиланмаган.

АҚШдаги Хитой элчихонаси изоҳлардан бош тортди. Хитой давлат ОАВлари эса аввалроқ Twitter’нинг қарорини «иккиюзламачилик» деб атаганди, деб ёзади Bloomberg.

Хитой кўп маротаба Шинжон-Уйғур мухтор туманидаги уйғурлар ҳамда бошқа этник ва диний озчиликлар ҳуқуқларини оммавий бузишда айбланган. Бундай айбловлар орасида стерилизация ва абортларга мажбурлаш ҳам бор. Бир неча кун аввал АҚШ дунёда биринчи бўлиб Хитой ҳукуматининг уйғурларга нисбатан муносабатини геноцид деб атади.

Хитой барча айбловларни рад этмоқда. АҚШ ҳукуматининг геноцид ҳақидаги баёнотидан кейин Пекин 28 нафар америкалик мансабдорга нисбатан санкциялар киритиб, уларни «Хитойга нисбатан янглиш фикр ва нафратда» айблади. Санкция рўйхатига геноцид ҳақида баёнот берган АҚШ собиқ давлат котиби Майк Помпео ҳам кирди.