Россия соғлиқни сақлаш вазири Михаил Мурашко коронавирусга қарши «Спутник-V» вакцинасининг рўйхатдан ўтказиш гувоҳномасига киритилган ўзгартиришлар вазирлик томонидан маъқулланганини маълум қилди, деб ёзади «РБК». Энди вакцинани аввалгидек -18 °C эмас, 2-8 °C ҳароратда сақлаш мумкин бўлади.
«Ишлаб чиқарувчи суюқ шаклдаги дори +2 дан +8 даражагача ҳароратда ташиш ва сақлаш шароитларида вакцинанинг барқарорлигини таъминлашга муваффақ бўлди, буни экспертиза тасдиқлади. Ушбу ҳарорат режими иммунобиологик дориларни сақлаш учун стандарт ҳисобланади», — деди вазир.
Унинг сўзларига кўра, модификацияланган вакцина ҳозир ишлаб чиқариш майдонларининг бирида чиқарилмоқда. «Ишлаб чиқариш майдонларидан бирида янги сақлаш шароитларини талаб қилувчи ‘Спутник V’ вакцинасини чиқаришнинг бошланиши бизга аҳоли учун янги коронавирус инфекциясига қарши оммавий эмлаш имкониятини ошириш ва унинг қамровни кенгайтириш имконини беради», — деди ССВ раҳбари.
Мурашконинг аниқлик киритишича, энди «Спутник V» вакцинасининг икки хил модификацияси ҳам қўлланилади: бири 18 даража совуқ ҳароратда, иккинчиси — илиқ ҳароратда сақланадиган вакциналар.
+2 дан +8 даражагача ҳароратда сақлаш талаб этиладиган «Спутник V» вакцинаси ҳозирча 6 та ишлаб чиқариш майдонининг биттасида чиқарилади, қолган майдонлар музлатилган вакцинани чиқаришда давом этади.
Meduza ишлаб чиқувчиларга яқин манбасига таяниб ёзишича, +8 даражада вакцина аввалгидек узоқ вақт сақланмайди — энди уни сақлаш муддати олти ой ўрнига икки ой бўлади. «Бу худди ўша дори, худди ўша таркиб, шунчаки сақлаш бўйича ҳарорат режими кенгайтирилган», — деди нашр ҳамсуҳбати.
«Гам-Ковид-Вак» («Спутник V»нинг расмий номи)нинг рўйхатдан ўтказиш гувоҳномаси бунгача дорининг -18 даражада сақланишини талаб қилар, ҳароратнинг ҳатто қисқа муддатга оширилишига йўл қўймасди. Бу вакцинани узоқ ҳудудларга етказиш ва у ерларда дорини сақлашда қийинчилик туғдираётган эди.
Вакцинанинг қуритилган шакли «Гам-Ковид-Вак-Лио» учун ҳам яна бир рўйхатдан ўтказиш гувоҳномаси берилган. Бу шакл музлатилгани билан биргаликда I ва II босқич синовларда (иккита босқич бирлашган тарзда ўтган) иммуногенлик (иммунитетнинг вакцинацияга реакцияси) бўйича деярли бир хил натижа кўрсатган. Аммо минглаб кўнгиллилар билан ўтказилган кенг кўламли тадқиқотда фақат музлатилган шакл — «Гам-Ковид-Вак» қўлланилган.
Мавзуга доир:
Изоҳ (0)