20-yanvar kuni soat 11:42 da Yangi Angren issiqlik elektr stansiyasining profilaktika choralarini ko‘rish uchun to‘xtatilgan 5-energiya blokida chang-ko‘mirli havo aralashmasining portlashi sodir bo‘ldi. Bu haqda FVV matbuot xizmati xabar berdi.

Qayd etilishicha, rejali xizmat ko‘rsatish paytida sodir bo‘lgan hodisa oqibatida uch kishi olingan jarohat sababli vafot etgan, yana uch kishi turli darajada kuyish tan jarohati olgan.

Vafot etgan va jarohat olganlar 5-energiya blokida profilaktika ishlarini olib borayotgan xizmat ko‘rsatish xodimlari bo‘lgan.

Favqulodda vaziyatlar vazirligining kuch va vositalari voqea joyida vaziyat oqibatlarini bartaraf etish ishlarini olib bormoqda. Portlashning kelib chiqish sabablari bo‘yicha surishtiruv ishlari boshlangan.

Hodisa natijasida Yangi Angren issiqlik elektr stansiyasining infratuzilmasi va texnologik uskunalariga shikast yetmagan. Vazirlik qo‘shimcha ma’lumot kelib tushishi bilan rasmiy resurslar orqali e’lon qilinishini bildirdi.

Bosh prokuratur matbuot xizmatining ma’lum qilishicha, hozirda mazkur holat yuzasidan Angren shahar prokuraturasi tomonidan tergovga qadar tekshiruv harakatlari olib borilmoqda.

Eslatib o‘tamiz, 2020-yilning yanvar oyida ham “Yangi Angren” IESda yong‘in yuz bergandi.