Тошкентда 2021 йилда мактабгача таълим ёшидаги болаларнинг 100 фоизи боғчага қамраб олинади

Тошкент шаҳрида 2021 йилда 22 та мактабгача таълим ташкилоти реконструкция қилинади. Бу ҳақда 19 январь, сешанба куни бўлиб ўтган Халқ депутатлари Тошкент шаҳар кенгашининг ўттиз биринчи сессиясида Тошкент шаҳар ҳокими Жаҳонгир Ортиқхўжаев айтиб ўтди.

Сессияда маълум қилинишича, Тошкент шаҳрида 2021 йил битта янги 333 ўринли мактабгача таълим ташкилоти қурилади ва 22 та мактабгача таълим ташкилотида реконструкция ишлари амалга оширилади. Қамровда эҳтиёж катта бўлган Олмазор, Шайхонтоҳур, Учтепа туманларида жами 17 та мавжуд мактабгача таълим ташкилоти ҳудудига қўшимча бинолар қуриш ва уларнинг қувватини ошириш ҳисобига яна 2 минг 200 нафар бола қамраб олинади.

Жаҳонгир ортиқхўжаевнинг таъкидлашича, «бу вақтинчалик, яна ҳозир қўшимча мактабларни қуриш бўйича режаларимиз ишлаб чиқиляпти».

Қўшимча қилинишича, қамровда эҳтиёж катта бўлган Олмазор, Шайхонтоҳур, Учтепа туманларида жами 17 та мавжуд мактабгача таълим ташкилоти ҳудудида қўшимча бинолар қуриш ва уларнинг қувватини ошириш ҳисобига яна 2 минг 200 нафар бола қамраб олинади.

«Мактабгача таълим ташкилоти биноларининг таъмирталаблиги сабабли фаолияти тўхтатилган 125 та ёпиқ гуруҳнинг бинолари таъмирланиб, қайта ташкил этилади. Бугунги кунда янги қурилган ва таъмирдан чиқарилган 14 та мактабгача таълим ташкилоти ҳамда 149 та гуруҳ керакли бўлган жиҳозлар билан таъминланади. Тошкент шаҳрида мактабгача таълим муассасаларига қамрови бугунги кунда 91,5 фоизни ташкил этаётган бўлса, юқоридаги ишларни амалга ошириш натижасида йил якунига қадар 100 фоиз қамровга эришилади», — деди ҳоким.

Президент Шавкат Мирзиёев 29 декабрь куни Олий Мажлисга йўллаган Мурожаатномасида келгуси йилларда Ўзбекистоннинг мактабгача таълим соҳасини ривожлантириш борасидаги стратегик мақсади — ижтимоий аҳволидан қатъи назар, боғча ёшидаги ҳар бир болани ушбу таълим йўналиши билан тўлиқ қамраб олиш учун зарур шароитларни яратишдан иборат эканлигини айтиб ўтган эди.

Мурожаатномада таъкидланишича, 2021 йил якуни билан мактабгача таълим қамровини 65 фоизга, 2023 йил охирида эса 75 фоизга етказилиши керак. Бу ишларга бюджетдан 600 миллиард сўм субсидия бериш ҳисобидан қўшимча 2 мингта нодавлат боғча ташкил этилиб, хусусий сектор улуши 25 фоизга етказилади. Шунингдек, 2021 йилда мактабга тайёрлашнинг бепул тизими билан 560 минг нафар 6 ёшли бола ёки уларнинг 82 фоизи қамраб олинади.