АҚШнинг Калифорния штатида коронавируснинг янги мутацияси аниқланди. У мазкур минтақанинг ўзида пайдо бўлган бўлиши мумкин. Бу ҳақда «РБК» хабар бермоқда.
АҚШда 2020 йилнинг декабрь ойи охирида олимлар коронавируснинг «британча» штаммини қидиришни бошлаганди, аммо улар янги турга дуч келди.
Таъкидланишича, CAL.20C деб номланган янги мутация июль ойида пайдо бўлган ҳамда ноябрь ойига келибгина кенг тарқала бошлаган, дея тахмин қилинмоқда.
Янги штамм 13 январь куни Лос-Анжелесдаги лаборатория намуналарининг ярмидан кўпида аниқланган.
«Бизнинг ҳали Европага етиб бормаган ўз муаммомиз бор. Бу штамм аслида шу ерда пайдо бўлган. Қишки таътил унинг юзага келиши ва тарқалишига замин яратган бўлиши мумкин», — деди Лос-Анжелесдаги Сидар-Синай тиббиёт маркази олими Жасмин Пламмер.
Мазкур штамм бошқаларига қараганда хавфли экани тўғрисида ҳали бирорта далил йўқ. Тарқалиш тезлиги қай даражадалиги ҳам номаълум.
Маълумот учун, декабрь ойи ўрталарида Буюк Британияда коронавируснинг янги тури аниқланганди. Бош вазир Борис Жонсоннинг сўзларига кўра, у «одатдаги» SARS-CoV-2’га қараганда 70 фоизга юқумлироқ бўлиши мумкин. Кейинчалик вируснинг янги варианти бошқа мамлакатларга тарқалди.
Аввалроқ АҚШнинг Огайо университети олимлари коронавируснинг иккита янги штаммини аниқлагани, биринчи мутация «британча»га ўхшаш бўлса-да, лекин катта эҳтимол билан АҚШнинг ўзида пайдо бўлгани хабар қилинганди.
Мавзуга доир:
Изоҳ (0)