АҚШнинг сайланган президенти Жо Байден 20 январь куни иш бошлаганидан бир неча соат ўтгач Дональд Трамп администрацияси томонидан етказилган «энг ёмон зарарни» қайтариш тўғрисида бир нечта фармон, меморандум ва кўрсатмаларни имзолайди. Бу ҳақда Байден жамоасининг баёнотига таяниб Meduza хабар қилди.
Байден, бошқа нарсалар қатори, Қўшма Штатларни Жаҳон соғлиқни сақлаш ташкилоти (ЖССТ) таркибидан чиқариш тўғрисидаги қарорни бекор қилишни режалаштирмоқда. Баёнотда айтилишича, ЖССТ «COVID-19 га қарши кураш бўйича халқаро тадбирларни мувофиқлаштириш учун жуда муҳимдир».
«Қўшма Штатлар ЖССТ билан алоқаларни тиклаганидан сўнг Байден–Харрис маъмурияти ЖССТ ва ҳамкорларимиз билан ташкилотни мустаҳкамлаш ва ислоҳ қилиш устида ишлайди», – дейилади баёнотда.
Бундан ташқари, Байден АҚШ–Мексика чегарасида девор қурилишини тўхтатиб, бир қанча мусулмон давлатлари фуқаролари учун кириш чекловларини олиб ташламоқчи.
Мавзуга доир: АҚШ президентларининг инаугурациялари қандай ўтган? Энг эсда қоларли маросимлар (фото)
Маълумот учун, Жо Байден 2020 йил ноябрь ойида бўлиб ўтган АҚШ президентлик сайловларида ғолиб чиқди. У АҚШ Демократик партиясининг вакили ҳисобланади.
Аввалроқ Вашингтонга инаугурация чоғида тартибни таъминлаш учун 25 минг нафар Миллий гвардия ҳарбийлари етиб келгани, Дональд Трамп хайрлашув нутқини эълон қилгани ҳамда Трамп Байденнинг инаугурациясидан бир кун аввал коронавирус туфайли АҚШга киришга қўйилган тақиқни бекор қилгани ҳақида хабар берилган эди.
Мавзуга доир: Фото: Дональд Трамп Оқ уйни тарк этди
Изоҳ (0)