Koronavirusning yangi mutatsiyalari, shu jumladan, yaqinda Yaponiyada qayd etilgan turi hozircha kasallikning kechish og‘irligiga ta’sir o‘tkazmaydi. Bu haqda Jahon sog‘liqni saqlash tashkiloti (JSST) direktori Tedros Gebreyesus brifingda ma’lum qildi, deb yozadi “RBK”.

Foto: Reuters

“O‘tgan dam olish kunlari Yaponiya JSSTga virusning yangi varianti aniqlangani haqida xabar berdi. Virus qanchalik ko‘p tarqalsa, uning turlari paydo bo‘lishi uchun shunchalik ko‘p imkoniyatlar yuzaga keladi”, — dedi u.

JSST direktorining qayd etishicha, hozircha aniqlangan mutatsiyalar COVID-19’ning og‘irlik darajasini oshirmaydi.

Gebreyesus ogohlantirishicha, yangi shtammlarning paydo bo‘lishi shundoq ham bosim ostida qolgan sog‘liqni saqlash tizimining ishini qiyinlashtiradi. U odamlardan tavsiya etilgan ehtiyot choralariga rioya qilishni so‘radi, chunki agar virus kamroq tarqalsa, uning mutatsiyaga uchrash ehtimoli ham kamroq bo‘ladi.

Yaponiyada yangi shtammni yuqtirib olgan to‘rt kishi qayd etildi, ular Braziliyadan kelgan. Yuqumli kasalliklar milliy institutida ma’lum qilishlaricha, hozircha shtamm yuqumliroq ekanligi borasida dalillar yo‘q. Ayni vaqtda institut rahbari Takadzi Vakita xabar qilishicha, bu mutatsiya koronavirusning Buyuk Britaniya va Braziliyada tarqalayotgan yuqumliroq turlariga o‘xshash jihatlarga ega.