Қишки гардеробни қалин кийим-кечакларсиз тасаввур қилиб бўлмайди. Совуқ ҳароратда исиниш ва чиройли кўриниш учун эса шарф энг яхши аксессуар ҳисобланади. Шарфни фақатгина пальто билан яхши туради деганлар қаттиқ адашади, мослаш ва дид билан кийилса, куртка билан ҳам кўнгилдагидек образга эга бўлиш мумкин.
Қолаверса, шарф ўрашнинг турли қизиқарли усуллари бор. Оддийгина бўйиндан айлантириб олиш шарт эмас, бир тарафини елкага ташлаб иккинчи учи шундай турса ҳам, бўйин қисмингизга совуқ кирмайди ва услубингиз ҳам ноодатий кўринади. Агар шарфингиз шакли тўртбурчак бўладиган бўлса, унинг икки учини букланг, учларини бўйиннинг орқа қисмига бирлаштиринг.
Қалин ва чоклари бўртиб тўқилган шарфлар билан эса исталган образ долзарб кўринади. Куртка кийганда уни шундоқ бўйиндан ташлаб қўйишнинг ўзи билан ҳам кийинишингиз аввалгидек зерикарли бўлмаслигига сабабчи бўласиз. Агар сиз учун қулайлик ва иссиқлик ҳаммасидан ҳам муҳим бўладиган бўлса, унча қалин бўлмаган шарфни куртка ичидан бўйинга маҳкам қилиб ўранг.
Ранглар комбинацияси ҳақида гап кетганда шарфдан образингизга алоҳида урғу бериш учун фойдаланяпсизми ёки бошқа кийим-кечакларга мослашми, ниятингизни аниқлаштириб олинг. Агар урғу бермоқчи бўлсангиз, бошдан оёқ бир ёки унча ёрқин бўлмаган рангда кийиниб ёрқин шарф тақиш тавсия қилинади. Уйғунлаштириш учун куртка рангига мос ёки ҳамма ранг билан тушиши мумкин бўлган оч жигарранг ва кул ранг шарфга эътибор қаратганингиз яхши. Қолаверса водолазка, этик, сумка ёки бошқа кийимнинг ранги билан бир хилдаги шарф тақишингиз ҳам мумкин.
Шунда ҳам замонавий комбо қилишга иккиланаётган ва танлов борасида нимада тўхталишни билмаётган бўлсангиз суратдаги моделлар образидан илҳомланишингиз мумкин.
Изоҳ (0)