Qishki garderobni qalin kiyim-kechaklarsiz tasavvur qilib bo‘lmaydi. Sovuq haroratda isinish va chiroyli ko‘rinish uchun esa sharf eng yaxshi aksessuar hisoblanadi. Sharfni faqatgina palto bilan yaxshi turadi deganlar qattiq adashadi, moslash va did bilan kiyilsa, kurtka bilan ham ko‘ngildagidek obrazga ega bo‘lish mumkin.
Qolaversa, sharf o‘rashning turli qiziqarli usullari bor. Oddiygina bo‘yindan aylantirib olish shart emas, bir tarafini yelkaga tashlab ikkinchi uchi shunday tursa ham, bo‘yin qismingizga sovuq kirmaydi va uslubingiz ham noodatiy ko‘rinadi. Agar sharfingiz shakli to‘rtburchak bo‘ladigan bo‘lsa, uning ikki uchini buklang, uchlarini bo‘yinning orqa qismiga birlashtiring.
Qalin va choklari bo‘rtib to‘qilgan sharflar bilan esa istalgan obraz dolzarb ko‘rinadi. Kurtka kiyganda uni shundoq bo‘yindan tashlab qo‘yishning o‘zi bilan ham kiyinishingiz avvalgidek zerikarli bo‘lmasligiga sababchi bo‘lasiz. Agar siz uchun qulaylik va issiqlik hammasidan ham muhim bo‘ladigan bo‘lsa, uncha qalin bo‘lmagan sharfni kurtka ichidan bo‘yinga mahkam qilib o‘rang.
Ranglar kombinatsiyasi haqida gap ketganda sharfdan obrazingizga alohida urg‘u berish uchun foydalanyapsizmi yoki boshqa kiyim-kechaklarga moslashmi, niyatingizni aniqlashtirib oling. Agar urg‘u bermoqchi bo‘lsangiz, boshdan oyoq bir yoki uncha yorqin bo‘lmagan rangda kiyinib yorqin sharf taqish tavsiya qilinadi. Uyg‘unlashtirish uchun kurtka rangiga mos yoki hamma rang bilan tushishi mumkin bo‘lgan och jigarrang va kulrang sharfga e’tibor qaratganingiz yaxshi. Qolaversa vodolazka, etik, sumka yoki boshqa kiyimning rangi bilan bir xildagi sharf taqishingiz ham mumkin.
Shunda ham zamonaviy kombo qilishga ikkilanayotgan va tanlov borasida nimada to‘xtalishni bilmayotgan bo‘lsangiz suratdagi modellar obrazidan ilhomlanishingiz mumkin.
Izoh (0)