Спорт пойабзали ҳисобланмиш кроссовкалар узоқ вақтдан бери махсус оёқ кийим бўлишдан тўхтаган. Уни ҳар қандай либос билан мослаштириш мумкин. Аммо айрим ҳолатларда камчиликларга йўл қўйилади ва услубнинг хато эканлиги намоён бўлади.
Кроссовкаларни пайпоқсиз кийиш
Биринчидан, бу гигиена талабларига жавоб бермайди. Оёқ терлаганда, табиийки, сирғалиш ортидан тирналиш ёки шикастланиш ҳолатлари юзага келиши мумкин. Шунингдек, яна бир ёқимсиз натижаларнинг бири — замбуруғ касаллиги хавфи мавжуд. Бу эса кейинчалик жуда катта муаммога айланиши шубҳасиз.
Нотўғри узунликдаги шим
Бу, аввало, оёқнинг тўпиқ қисмида қават-қават бўлиб турувчи шимларга тегишли. Бундай бурмалар тартибсиз кўринишга эга бўлиб, оёқни сезиларли даражада семиз ва калта кўрсатади. Худди шу ҳолат узун ва кенг шимлар билан боғлиқ. Фақатгина бунда шим ерга тегиб туради. Албатта, бу ҳам кўзга ташланадиган хунук манзара. Узун шим кийишни хуш кўрувчилар эътиборини баланд пошнали оёқ кийимларга қаратгани маъқул.
Спорт ва классик услубни уйғунлаштириш
Балки бир қанча юлдузларнинг бу каби комбинацияда кийинганини кўриш мумкиндир, аммо бир қатор истисно ҳолатлар мавжуд. Бунинг учун ҳар қандай классик услуб эмас, костюм бичими ва кроссовка ҳажми бир-бирига мутаносиб бўлиши керак. Бундан ташқари, аксарият кроссовкалар классик услуб билан доим ҳам мослашавермайди.
Оқшом либоси ва кроссовка
Кроссовка кийиш қанчалар қулай ва ёқимли бўлмасин, уларни асло оқшом либоси билан кийманг. Гарчи зиёфатни қисқа муддат ичида тарк этиш режаси бўлса ҳам, буни чиройли пойабзал билан амалга ошириш мантиқан тўғри бўлади. Айтганча, классик ёки зиёфат учун мўлжалланган пойабзалларнинг ҳам қулайликда кроссовкадан қолишмайдиганлари мавжуд.
Оқ кроссовка ва қалин колготка
Ёзги оқ кроссовка ва совуқ мавсумда кийиладиган қалин колготкалар ҳар қандай ҳолатда ҳам комбинация ҳосил қилмайди. Шунингдек, ранглар ва номутаносиблик оёқ узунлигини визуал равишда қисқартиради ва семиз кўрсатади. Совуқ ҳавода кроссовкани бошқа қишки пойабзал билан алмаштирган маъқул. Улар ҳар қандай қалин либослар билан уйғунлаша олади.
Тор юбка ва спорт пойабзали
Тор юбкалар чиройли қоматни акс эттириб турган бир вақтда, фақатгина катта ҳажмли кроссовкалар кўринишга путур етказиши мумкин. Шунингдек, оёқлар ҳам калта ва семиз кўринишга келиб қолади. Ушбу комбинация эрталабки жисмоний машғулотдан кейин гўёки пойабзал алмаштиришга улгурмаган инсонни эслатади.
Ҳар кунги кроссовкани спорт машғулоти учун кийиш
Югуриш ёки спорт зали учун кундалик ҳаётда кийиладиган кроссовкалар кийилмайди. Ўқув пойабзали алоҳида, тизза, орқага юкни тўғри тақсимлаш ва жароҳатлардан сақланиш учун мўлжалланган. Шунинг учун кроссовкани қаерга кийишда оқилона танловни амалга ошириш тавсия этилади. Бу эса саломатлик учун хавфсиз ҳамда самарали бўлади.
Изоҳ (0)