Италия коронавирус билан боғлиқ фавқулодда ҳолат режимини апрель ойининг охиригача узайтиришга қарор қилди, деб хабар берди 13 январь куни Il Riformista нашри.
Италия соғлиқни сақлаш вазири Роберто Сперанзанинг сўзларига кўра, расмийлар коронавирус билан боғлиқ вазиятнинг ёмонлашишини ҳар жабҳада кўрмоқдалар, шунинг учун улар янги чораларни кўришлари шарт.
«Ҳукумат, авваламбор, 31 январда бекор қилиниши режалаштирилган фавқулодда ҳолат режимини 30 апрелгача узайтиришни зарур деб ҳисоблайди», – деди Сперанза.
Италияда энди барча ҳудудлар коронавирус билан боғлиқ ҳолатга қараб, энг оғиридан энг енгилигача, «қизил», «сариқ» ва «яшил» зоналарга бўлинади. Энди расмийлар «оқ» зонани жорий этиш мумкин деб ҳисоблайдилар. Сперанзанинг сўзларига кўра, бундай жойларда фақат COVID-19’га қарши курашнинг энг оддий қоидаларига риоя қилиш керак бўлади, масалан, ниқоб кийиш. Унинг таъкидлашича, «бу зонанинг яқин келажакда пайдо бўлиши эҳтимолдан йироқ, аммо умидни йўқотмаслик керак».
Сперанза 13 январь куни парламентда сўзга чиқди ва шу ҳафта Италия ёмонлашаётган эпидемиологик ҳолатга дуч келганини айтди. Шу муносабат билан Италия ҳукумати нафақат «қизил» ҳудудларда, балки «сариқ» ҳудудда ҳам минтақалар ўртасида одамларнинг ҳаракатланишига тақиқ қўйиши мумкин.
Жонс Ҳопкинс университетининг маълумотларига кўра, пандемия даврида мамлакатда 2,3 миллиондан ортиқ коронавирусга чалинганлар рўйхатга олинган, деярли 80 минг киши вафот этган.
Сўнгги вақтларда коронавирусга чалиниш ҳолати кўпайгани боис Токио билан Лондонда фавқулодда ҳолат, Қозоғистон ҳамда Германияда коронавирус туфайли чекловлар кучайтирилди, Ливан ва Шотландияда эса яна карантин жорий этилди.
Изоҳ (0)