Италиянинг Ламезия-Терме шаҳрида 13 январь куни «Ндрангета» мафия ташкилоти аъзолари устидан суд жараёни бошланди. The Local нашрининг ёзишича, судда 355 киши – уюшган жиноий гуруҳ аъзолари, шунингдек, сиёсатчилар, адвокатлар, ишбилармонлар қатнашмоқда, дея хабар бермоқда Meduza.
Коронавирус пандемияси туфайли биринчи учрашувда айбланувчиларнинг ҳеч бири шахсан қатнашмади. Улар суд бошланишини видеоалоқа орқали кузатиб борди. Уларнинг юзлари залга ўрнатилган ўнлаб телевизорларда намойиш этилди.
Ушбу иш бўйича судланувчилар 1990 йилларда содир этилган бир қатор жиноятлар, жумладан, қотиллик, гиёҳванд моддалар савдоси, товламачилик, пул ювиш ва мансаб ваколатларини суиистеъмол қилишда айбланмоқда.
The Local нашрининг ёзишича, яқинда бўлиб ўтган эшитиш пайтида судланувчиларнинг исмларини ўқиш учун уч соат вақт кетган. Уларнинг орасида қарийб 20 йил қамоқда ўтирган Амаки лақаби билан танилган гуруҳ раҳбари Луиджи Манкусо, Бўри, Семиз, Ёқимтой, Малласоч ва Кичкина эчки каби тахаллусли бошқа ўнлаб судланувчилар бор.
Таъкидланишича, суд жараёни учун юқори даражадаги ҳимояга эга махсус бино қурилган. Учрашувлар минг ўринли залда бўлиб ўтмоқда. Биринчи тингловлардан сўнг айбланувчилар жараёнда шахсан иштирок этиши кутилмоқда. Улар ҳибсда ниқоб кийган ҳолда ва бир-биридан икки метр масофада ўтиришади.
With so many defendants on video link from their jails, Italy's biggest mafia trial in 30 yrs is looking like the world's biggest mob Zoom pic.twitter.com/cLgCUmzMJ1
— Tom Kington (@tomkington) January 13, 2021
Суд мажлисларида 900 дан ортиқ прокуратура гувоҳлари ва 400 нафар адвокат сўзга чиқади. Маҳаллий газетанинг ёзишича, суд омерта – мафия аъзоларини ҳукумат билан ҳамкорлик қилишини тақиқловчи Шараф кодексини бузишга тайёр бўлган 58 гувоҳнинг кўрсатмаларини тинглайди.
Айбланувчиларнинг деярли барчаси 2019 йил декабрида ҳибсга олинган ва терговнинг ўзи 2016 йилдан бери давом этмоқда. Тергов Италиянинг камида 11 минтақасини қамраб олган. Айбловларни тасдиқлаш учун терговчилар айбланувчиларнинг 24 минг суҳбатини тинглашди.
«Ндрангета»га қарши терговни олиб борган прокурор Никола Граттерининг маълум қилишича, бу 1986–1992 йилларда Сицилиянинг Палермо шаҳрида 475 киши суд қилинганидан буён ўтказилган энг йирик мафия операцияси. 62 ёшли Граттери Италиянинг мафияга қарши энг таниқли прокурори ҳисобланади. BBC таъкидлашича, прокурор ўттиз йилдан ортиқ вақт давомида полиция ҳимоясида яшаб келмоқда.
Аввалроқ Испанияда рус мафиясига оид иш бўйича қўлга олинган россияликларнинг исм-шарифлари ошкор қилингани ҳамда Ал Капоненинг 90 йиллик Cadillac машинаси миллион долларга сотувга қўйилгани ҳақида хабар берилганди.
Изоҳ (0)