ЖССТ мактаб, боғча ва касалхоналарда соғлом овқатланишни таъминлашга чақирди

ЖССТ дунё мамлакатларини давлат муассасалари — мактаб, болалар боғчалари, касалхона ва қариялар уйларида соғлом овқатланиш билан таъминлашга чақирди, деб хабар бермоқда БМТ Янгиликлар маркази.

Ташкилот нотўғри овқатланиш организмга катта зарар етказишини, оқибатда саратон, диабет ва юрак-қон томир касалликлари каби жиддий, сурункали касалликларга олиб келиши мумкинлигини эслатди.

«Ҳукуматларга бошқалар учун намуна бўлиш ва давлат идораларида бериладиган ёки сотиладиган овқатлар соғлом бўлиши учун барча имкониятларни ишга солиш пайти келди», — деган ЖССТ раҳбари Тедрос Гебрейесус. «Давлат маблағлари носоғлом озиқ-овқатга сарфланмаслиги керак», — дея қўшимча қилган у.

ЖССТ ҳисоб-китобларига кўра, ушбу муассасаларда соғлом овқатланиш ҳар йили 8 миллионгача кишилар ҳаётини сақлаб қолиши мумкин.

Мутахассислар мамлакатларга жамоат ошхоналарида овқатланиш менюсини янгилашга ёрдам берувчи ҳаракатлар режасини эълон қилди. Унда қуйидагиларни таклиф қилинмоқда:

• туз истеъмолини камайтириш ва ошпазларнинг ёдланган туздан фойдаланганига ишонч ҳосил қилиш;
• шакар истеъмолини камайтириш;
• тўйинган ёғларни ўз ичига олган озиқ-овқат маҳсулотларидан фойдаланишни тўхтатиш;
• трансёғларни рациондан бутунлай чиқариб ташлаш;
• мева, сабзавот, дон ва дуккакли экинлар, шунингдек, ёнғоқ истеъмолини сезиларли даражада ошириш;
• тоза ичимлик суви билан бепул таъминлаш.

Хусусан, Бразилияда янги қонунларга биноан мактабда овқатланиш учун ажратиладиган маблағларнинг 30 фоизи маҳаллий фермер хўжаликларининг янги ва мавсумий маҳсулотларига сарфланиши керак. Шунингдек, мактаб менюсида яримтайёр маҳсулотлар бўлмаслиги керак.

Жанубий Корея ҳукумати мактаблардан 200 метр рadiusда соғлом овқатланиш зоналарини ташкил этди. Ушбу зоналардаги ресторан ва кафеларда шакар, тўйинган ёғ ёки калория белгиланган меъёрдан ортиқ бўлган озиқ-овқат маҳсулотларини сотиш тақиқланади.

Ўзбекистон Президенти 2020 йил 10 ноябрь куни «Аҳолининг соғлом овқатланишини таъминлаш бўйича қўшимча чора-тадбирлар тўғрисида»ги қарорни имзолаганди. Давлат раҳбари тиббиёт тизимининг камида 50 фоиз иши аҳолини тўғри овқатланиш ва жисмоний тарбияга ўргатиш бўлиши лозимлигини таъкидлаган.