Бельгия пойтахти Брюсселда 13 январь, чоршанба куни «Ибрагим учун адолат» норозилик акцияси чоғида тартибсизликлар юзага келди. Акция ўтган дам олиш кунлари полиция участкасида вафот этган қора танли муҳожир Ибрагим Баррининг хотирасига бағишланган.
Намойишдан кейин юзга яқин одам полиция учун ҳақоратли бўлган шиорларни баралла айтиб, тутун шашкаларини улоқтира бошлади. Тартибга чақирган полициячиларга тош ёғдирди, полиция участкасини эса ёқиб юборишга уринди.
Тартибсизликларда қатнашган камида 112 киши қўлга олинди.
Брюсселнинг Сен-Жосс коммунаси маъмурияти раҳбари Эмир Кир ўз Twitter’ида ёзишича, тартибсизликлар провокацияларни амалга ошириш ва шаҳар мулкига зарар етказиш учун «вазият»дан фойдаланиб қолган фуқароларнинг масъулиятсиз хатти-ҳаракатлари оқибатида келиб чиққан.
Айни пайтда Бельгия пойтахтида тартиб ўрнатилган. Транспорт ҳаракати қайта тикланган. Шаҳар хизматлари ҳудудни тозалашга киришган. Полиция тўқнашувлар оқибатида ҳибсга олинганлар ва жабрланганларнинг аниқ сонини эълон қилиши кутилмоқда.
Асли гвинеялик 23 ёшли Ибрагим Барри 9 январь куни Брюсселдаги Шимолий вокзалда ҳужжатларни текшираётган полициячиларни смартфон камерасига олган. ОАВларга кўра, полициячилар карантин қоидаларига зид тарзда вокзал атрофидаги майдонда тўпланган ёшларни тўхтатмоқчи бўлган. Улар Ибрагимдан ҳужжатларини талаб қилган, аммо у қўрқиб қочиб кетган. У қўлга олинган ва полиция участкасига келтирилган, у ерда кутилмаганда ҳушини йўқотиб, вафот этган. Таъкидланишича, унда юрак хуружи юз берган. Тез ёрдам шифокорлари унинг ҳаётини сақлаб қололмаган. Полициячилар дефибриллятор ёрдамида уни жонлантиришга уринган, аммо у носоз бўлиб чиққан.
Қайд этилишича, Бельгия қироли Филиппнинг кортежи тартибсизликлар марказига келиб қолган. Уни намойишчилардан тўсиш учун кортежга полициячилар ҳамроҳлик қилган. Монархга зиён етмаган.
https://twitter.com/SteveRightNLeft/status/1349433660907380739
Мавзуга доир:
Изоҳ (0)