Жанубий Суданда қўлга олинган Pussy Riot иштирокчилари Пётр Верзилов ва блогер Илья Варламов қўйиб юборилди. Бу ҳақда Россия Ташқи ишлар вазирлиги маълум қилди, деб хабар беради Meduza.
Шунингдек, улар билан бирга қўлга олинган бошқа россияликлар ҳам озод этилган — Варламовнинг рафиқаси Любовь, бундан ташқари, Европа гимназияси директори Иван Богансев ва унинг дўсти Вадим Гинзбург.
ТИВнинг маълум қилишича, ҳозирда Россия фуқароларининг Жанубий Судандан чиқиб кетиши борасидаги масалалар ҳал этилмоқда.
Эслатиб ўтамиз, россиялик таниқли блогер Илья Варламов ва «Медиазона» ношири, аксионисти Пётр Верзилов Жанубий Суданга саёҳати пайтида — 13 январь куни ҳибсга олинганди.
Маълум қилинишича, россияликлар Варламовнинг юкидан топилган дрон пульти туфайли парвоздан олиб қолиниб, полицияга олиб кетилган. Маҳаллий хавфсизлик ходимларининг фикрича, улар «ҳарбий объектларни дрондан тасвирга олган бўлиши мумкин». Дрон улардан Угандада саёҳат қилиб юрган вақтларидаёқ олиб қўйилган. Варламовнинг тахминига кўра, суданлик ҳарбийлар ундан шунчаки дронни мусодара қилмоқчи бўлган, аммо уни топа олмагач хафа бўлиб уларнинг ҳаммасини ҳибсга олган.
Аввалроқ Илья Варламов Андижонда содир бўлган «самосуд»дан кейин Ўзбекистонга келиш фикридан қайтганди.
Изоҳ (0)