Амалдаги АҚШ президенти Дональд Трампнинг бир неча минглаб тарафдорлари 20 январь, чоршанба куни сайланган давлат раҳбари Жо Байденнинг инаугурациясига халақит бериш учун Капитолийга шиддатли ҳужум уюштиришни режалаштирмоқда. Бу ҳақда конгресс вакилларига ҳуқуқ-тартибот органлари томонидан хабар берилган, деб ёзади «РБК».
«Улар бирорта ҳам демократнинг киришига йўл қўймаслик учун Капитолийни қуршаб оладиган 4 минг нафар қуролли ‘ватанпарвар’ ҳақида айтмоқда. Улар жанговар ҳаракатлар олиб бориш қоидаларини, яъни қачон отишингиз мумкин, қачон мумкин эмаслиги ҳақидаги қоидаларни эълон қилди. Демак, бу ўз режаларига эга уюшган гуруҳ», — деди вакиллар палатаси аъзоси Конор Лэмб CNN телаканали эфирида.
Унинг сўзларига кўра, бу гуруҳ жуда жиддий кайфиятда, аммо конгресс вакиллари улар билан музокаралар олиб бормаяпти ва уларни фикридан қайтаришга уринмаяпти. «Уларни айблаш керак. Уларни тўхтатиш керак. Бу, афсуски, президентга тегишли. Шунинг учун биз унга импичмент эълон қилиб, ҳокимиятдан четлатишимиз керак», — деди Лэмб.
Конгрессмен таъкидлашича, ҳуқуқ-тартибот органлари бу хатарни ўта жиддий деб ҳисоблаб, воқеаларнинг бундай тус олишига тайёрланмоқда.
Аввалроқ АҚШ Федерал қидирув бюроси (ФҚБ) Американинг барча штатлари марказлари ва Вашингтонда 16—20 январь кунлари қуролли норозиликлар режалаштирилаётгани ҳақида огоҳлантирган эди.
Трамп эса Вашингтонда фавқулодда вазият режимини тасдиқлади ва сайланган президент Жо Байденнинг 20 январдаги инаугурацияси олдидан хавфсизликни таъминлаш учун қўшимча федерал кучларни йўналтиришни буюрди.
Изоҳ (0)