Grozniyda Checheniston rahbari Ramzan Qodirov nomini berishga qaror qilingan masjid qurilishi uchun kapsula qo‘yildi. Bu haqda 8-yanvar kuni “Grozniy” Checheniston davlat teleradiokompaniyasi ma’lum qildi, deb yozmoqda Meduza.
Telekanal ma’lumotlariga ko‘ra, “respublika aholisining ko‘p sonli iltimoslariga binoan” masjidga Ramzan Qodirov nomini berishga qaror qilindi. Qodirovning o‘zi bunday g‘oyaga “qat’iy qarshi” chiqqan, ammo jamoatchilik, diniy ulamolar va Checheniston rahbari safdoshlari o‘z fikrida turib olgan.
11-yanvar kuni Checheniston matbuot vaziri Ahmed Dudayev “RIA Novosti”ga bergan intervyusida “bizda demokratik jamiyat hukmron, respublika aholisining irodasi va xohishi bizda ustuvor ahamiyatga ega” deb aytgan.
Masjid ikki ming kishiga mo‘ljallangan bo‘ladi. Uning qachon qurilishiga aniqlik kiritilmagan. Ramzan Qodirovning vafot etgan otasi Ahmat Qodirov nomi bilan atalgan eng yirik masjidlardan biri bo‘lgan “Checheniston yuragi” qurilishi ikki yarim yil davom etdi.
“Grozniy” telekanali ma’lumotlariga ko‘ra, Chechenistonda 1200 tadan ortiq majid bor. 2020-yilda respublikada 32 ta masjid qurilgan, yana 70 ga yaqin masjidlar qurilishi davom etmoqda.
Izoh (0)