«Муҳташам юз йил» 10 ёшда: Оламшумул муваффақият қозонган сериал ҳақида қизиқарли фактлар (фото)

«Муҳташам юз йил» сериали суратга олинганига 10 йил тўлди. Дунё бўйлаб ушбу сериалнинг миллионлаб томошабинлари Султон Сулаймон ва Хуррамнинг севги ҳикоясини кузатди. Телеканаллар сериал рейтингидан ҳайратга ҳам тушди. Туркиядаги энг муваффақиятли сериал аслида қандай пайдо бўлган ва воқеалар тугалланган бўлса-да, нега сериални қайтадан томоша қилиш керак деган саволларга қуйида жавоб топиш мумкин.

Аввал орзу бўлган

Продюсер Темур Савжи Буюк Усмонли империяси, Султон Сулаймон ҳамда унинг севимли рафиқаси Хуррамнинг ажойиб муҳаббат қиссаси ҳақида туркум яратиш ҳақида ўйлай туриб, «Бундай лойиҳани амалга ошириш мумкин эмас, бу жуда масъулиятли ва мураккаб иш», − дея хавотирга тушган.

Унгача Туркияда бу каби сериал суратга олинмаган. Лойиҳанинг кўлами жуда кенг бўлиб, унда XVI аср манзаралари, жанглар ҳамда жуда машаққатли кастинг зарур эди. Продюсернинг ушбу ғоясини фақат сценарий муаллифи Мерал Акай қўллаб-қувватлади. У Савжини уддалашига ишонтирди. Шунингдек, истеъдодли режиссёр Дурул ва Ягмур Тайланлар ҳамкорлигида иш бошланиб, лойиҳа учун маблағ сарфланди.

Сулаймоннинг рақобатчилари бўлмаган

Акай ва Савжининг айтишича, тайёргарлик босқичида ҳам Усмонли империясининг ўнинчи султони ролида фақат Халит Эргенчни кўрган. Ушбу актёрдан бошқа ҳеч ким тасаввур ҳам қилинмаган. Актёр билан алоқага чиқилганда, у иккиланмасдан рози бўлган. Кейинчалик Эргенч бу унинг ҳаётидаги энг муҳим роль бўлиб қолишини англаган.

Кейинги бир ярим йил мобайнида декорациялар қурилаётган вақт ҳамда кастинг жараёнлари давом этаётганида Эргенч улов минишни ўрганди, кураш бўйича машғулотларга қатнашди ва Усмонли империяси тарихи ҳақида кўплаб китоблар мутолаа қилди. Буларнинг барчаси суратга олиш майдончасида фойда берди.

Хуррам роли учун актриса Россия ва Руминиядан қидирилган

Хуррам султонсиз «Муҳташам юз йил»ни тасаввур қилиб бўлмайди. Оддий канизакдан тарихдаги энг қудратли аёллардан бирига айланди. Бироқ ушбу ролга дарҳол тасдиқланган Халит Эргенчдан фарқли ўлароқ, унинг рафиқаси Хуррам 6 ойдан кўпроқ вақт давомида изланган.

Ижодий гуруҳ актрисани бутун Туркия, Россия, Руминия ва бошқа мамлакатлардан ҳам излаган. Аммо натижа бўлмаган. Фильмни суратга олиш ишлари бошланишига бир ҳафтадан ошиқ вақт қолганида, Темур Савжи Германияда улар излаган ижрочи борлигини аниқлаган: қизил соч, гўзал ҳамда славян кўринишга эга. У немис-турк актрисаси Марям Узерли эди. Қисқа муддат ичида Савжи ушбу ролни Хуррамдан бошқа ҳеч ким яхши ўйнай олмаслигини англаб етган.

Декорация − вақт машинасида саёҳат қилиш

Сериални ҳақиқий султонлар канизаклари билан яшаган машҳур Тўпқопи саройида суратга олиш имконсиз эди. Бунинг учун майдони 5 минг квадрат метр бўлган қадимий Истанбулнинг шаҳар манзараси, бозори ва кўчалари қурилди.

Декорация шу қадар ҳақиқий бўлганки, аксарият актёрларнинг фикрига кўра, улар чиндан ҳам ўзларини ўша даврдагидек ҳис қилган.

Музокарага сабаб бўлган либослар

Сериал экранларда намойиш этилганидан сўнг танқидчилар ва томошабинлар томонидан либосларга муносабатлар билдирилган. Сабаби султонлар ва канизаклар ҳаддан ташқари очиқ кийинган эди. Бу ўша даврдаги урф-одатларга, умуман, ислом қонунларига зид эди. Ўша даврда ҳеч қайси аёлда тор ва кўкси очиқ либос бўлмаган.

Стол, шамдон, парда ва кумушлар

Афсуски, буларнинг барчаси Сулаймон I даврида бўлмаган. Султон ва унинг а’ёнлари паст ўриндиқ ва ёстиқлардан фойдаланган. Идишлар тошбақа қобиғида берилиб, овқатлар қўл билан истеъмол қилинган ва оғиз дастурхон қиррасига артилган.

Сериалда эса қаҳрамонлар стол атрофида тўпланиб, шам ёруғида суҳбат қуради. Шунингдек, пичоқ, санчқи ва қоғоз салфеткалардан фойдаланган.

Хуррамнинг тўқима рақиблари

Хуррамнинг рақибларига нисбатан рашкдан ёниш саҳналари мавжуд. Сериалда Кастилия маликаси Изабелла мавжуд бўлса-да, у тарихда Султон Сулаймон тахтга ўтирмасидан аввал вафот этган. Феруза хотун эса тарихда мавжуд бўлмаган образ бўлиб, форслар юборган жосус тўқима образ сифатида намоён бўлган.

Камчиликлар − уларсиз сериалнинг қизиғи бўлмайди

Сериалда Сулаймоннинг ҳарбий юришлари билан боғлиқ саҳналарга алоҳида эътибор берилган. Сабаби у биринчи навбатда истеъдодли саркарда сифатида тан олинган.

Ҳар бир эпизод алоҳида эътиборга олинса-да, муҳаррир кўздан қолдирган жойлар ҳам топилади. Улардан бири Бали Бей (Бурак Ўзчивит) ортида кўриниб қолган трактор.

Ўғил онага қараганда каттароқ

Сериалда деярли барча актёрлар ўз қаҳрамонидан каттароқ эди. Бироқ Моҳидаврон султон (Нур Феттаҳўғли) ва шаҳзода Мустафо (Меҳмет Гунсур) мисолида ҳаммаси ўзгача бўлди. Ҳаётда фарзанд ролини ижро этган Гунсур онасидан 5 ёшга катта.

Бу ўринда визажистлар муваффақиятли иш олиб борди ва онанинг ёшини улғайтириб, ўғилни янада ёшартирди. Шуниси қизиқки, Меҳмет Халитдан унчалик ҳам кичик эмас, ота ва ўғил орасидаги фарқ ҳам атиги 5 йил.

«Муҳташам юз йил»дан кейин актёрларнинг фаолияти қандай кечди?

Кўплаб камчиликларга қарамай томошабинлар «Муҳташам юз йил» қаҳрамонларини яхши кўриб қолди. Улар ҳанузгача баҳсли саҳналарни муҳокама қилади, таассуротлар билан ўртоқлашади ва актёрлар ҳаётини кузатади. Актёрлар эса лойиҳа якунлангач, муваффақиятли мартабага эга бўлди. Аксарияти янги фильм ва сериалларда яна бош қаҳрамон сифатида роль ижро этган бўлса, яна баъзилари маълум сабабларга кўра карьерасини тарк этиб, ўзини бутунлай оиласига бағишлади.