Эроннинг олий раҳнамоси Оятуллоҳ Хоманаий АҚШ ва Буюк Британиядан коронавирус вакциналари импортини тақиқлади

Эроннинг олий раҳбари Оятуллоҳ Али Хоманаий 8 январь куни АҚШ ва Буюк Британияда ишлаб чиқарилган COVID-19 вакциналарини мамлакатга олиб кириш тақиқланганини маълум қилди, дея хабар бермоқда «Интерфакс».

«АҚШ ва Британиядан вакциналарни мамлакатга олиб кириш тақиқланди. Мен бу ҳақда расмийларга айтдим ва ҳозир оммавий равишда эълон қиляпман», – деди у Эрон телевидениесида.

Унинг сўзларига кўра, агар Қўшма Штатлар COVID-19’га қарши ҳақиқатан ҳам самарали вакцинани ихтиро қилган бўлса, уларга пандемия бунчалик ёмон таъсир қилмаган бўлар эди.

Маълумот учун, АҚШ Pfizer/BioNTech ва Moderna вакциналарини қўллашни маъқуллаган. Буюк Британия эса Pfizer/BioNTech ҳамда AstraZeneca вакциналарни қўллашни маъқуллаган.

COVID-19 ҳақида гап кетганда Эрон Яқин Шарқдаги эпидемиологик жиҳатдан энг ноқулай мамлакат деб ҳисобланади.

Эронда пандемия бошланганидан бери 1,2 миллиондан ортиқ коронавирусга чалиниш ҳолатлари аниқланган, беморларнинг 55,9 мингдан ортиғи вафот этди.

Эслатиб ўтамиз, декабрь ойи охирида Эрон одамларда ўзининг коронавирусга қарши вакцинаси бўйича клиник синовларни бошлаганди.