Дональд Трамп ёрдамчилари билан президентлик муддати тугагунча ўзини афв этиш имкониятини муҳокама қилди, деб ёзади The New York Times манбаларига асосланиб.
Нашр манбаларининг сўзларига кўра, Трамп ноябрь ойидаги сайловлардан сўнг, бир неча бор ёрдамчиларига ўзини афв этиш имкониятини кўриб чиқаётганини айтган, уларнинг бу борадаги фикри билан қизиқиб, бундай қарорнинг мумкин бўлган оқибатлари ҳақида сўраган.
Таъкидланишича, АҚШ тарихида бирор-бир президент ўзини ўзи ҳеч қачон афв этмаган. Ҳуқуқшунослар Трамп бундай қадамни ташлашга қарор қилса, суд унинг кечирилишини қонуний деб тан оладими ёки йўқми деган саволда икки гуруҳга ажралган.
Шунингдек, нашрнинг ёзишича, Трамп ўзи билан бирга оила аъзолари, яқинлари, шу билан бирга, маслаҳатчилари ва маъмуриятидаги мансабдорларни афв этиш бўйича қарорни муҳокама қилган. Трамп янги президент ҳокимиятга келганидан кейин уларга қарши жиноий иш қўзғатилиши мумкинлигидан қўрқади.
Трамп билан ишлаётганларнинг аксарияти бунга қарши. Чунки афв этиш тўғрисидаги қарорни қўлласалар, бу улар қилмаган жиноятлар учун айбни тан олиш, деб талқин қилиниши мумкин.
Маълумот учун, президентнинг кечирими фақат федерал даражада амал қилади ва штат даражасида таъқиб қилинишдан ҳимоя қилмайди.
Декабрь ойи охирида Дональд Трамп бошқалар қаторида ёлғон гувоҳлик бериш ва ноқонуний лоббичиликда айбланиб судланган ўзининг сайловолди штабининг собиқ раҳбари Пол Манафортни ҳамда солиқ жинояти учун судланган ва АҚШ президент сайловида Россиянинг аралашуви ишида айбланувчиларни ҳисобланган куёвининг отаси Чарльз Кушнерни афв этди.
Эслатиб ўтамиз, 6 январь куни Трампнинг тарафдорлари АҚШ Конгресси сайлов натижаларини тасдиқлаб, Жо Байденнинг ғалабасини расман тасдиқлаши керак бўлган Капитолий биносини шиддатли ҳужум билан эгаллаб олди. Сайловчилар ҳайъати аъзоларининг овозларини ҳисоблаш жараёни тўхтатилиб, 7 январь куни эрталаб давом эттирилди. Тартибсизликлар оқибатида беш киши ҳалок бўлди, ўнлаб полициячилар яраланди.
Вазият тинчлангач, Конгрессдаги Демократик партия вакиллари ва баъзи республикачилар амалдаги вице-президент Майк Пенсни Конституцияга киритилган 25-тузатишга мувофиқ, Дональд Трампни ҳокимиятдан четлатишга даъват этди. The New York Times маълумотларига кўра, Пенс ушбу чорага қарши чиқади. Уни Трамп маъмуриятидаги бир қатор мансабдорлар қўллаб-қувватлайди.
Вакиллар палатаси спикери Ненси Пелоси агар Майк Пенс ва унинг маъмурияти 25-тузатишни амалда қўлламаса, унда демократлар яна бир импичмент жараёнини бошлашга тайёрлигини маълум қилди.
Изоҳ (0)