Лондон мэри Содиқ Хон коронавирус инфекциясининг янги штамми тарқалиши ва касалхоналарда COVID-19 билан касалланганлар сонининг кўпайиши сабабли шаҳарда фавқулодда ҳолат эълон қилди. Бу ҳақда The Guardian хабар қилди.
Хон Буюк Британия бош вазири Борис Жонсондан Лондон мэриясига кенгайтирилган ваколатларни беришни, шу жумладан, диний йиғилишларни тақиқлаш ва оломон кўп бўлган жойларда ниқоб тақишни буюришни сўради.
Мэр шаҳар аҳолисини уйда ўтиришга чақирди.
«Агар биз зудлик билан ҳаракат қилмасак, соғлиқни сақлаш тизимимиз ишдан чиқади ва кўплаб одамлар ўлади», – деди Содиқ Хон.
Эслатиб ўтамиз, Буюк Британияда коронавируснинг янги тури аниқлангани, шу туфайли мамлакатнинг айрим ҳудудларида касаллик тарқалиш суръати тезлашгани ҳақида 14 декабрь куни маҳаллий Соғлиқни сақлаш вазирлиги раҳбари Мэттью Хэнкок маълум қилди. Буюк Британия бош вазири Борис Жонсоннинг сўзларига кўра, ушбу турдаги коронавирус аввалгиларидан 70 фоизга юқумлироқ, лекин ундан хавфли эмас.
Сўнгги вақтларда коронавирусга чалиниш ҳолати кўпайгани боис Токиода фавқулодда ҳолат, Қозоғистон ҳамда Германияда коронавирус туфайли чекловлар кучайтирилди, Ливан ва Шотландияда эса яна карантин жорий этилди.
Изоҳ (0)