Илон Маск Bloomberg талқинига кўра дунёдаги энг бадавлат одамга айланди. Бу унинг Tesla компанияси акцияларининг 7,9 фоизга ўсиши фонида юз берди, бунинг шарофати билан тадбиркорнинг бойлиги 194,8 миллиард долларгача ўсди — бу бир неча йиллардан буён биринчиликни эгаллаб келган Amazon асосчиси Жефф Безоснинг давлатидан 9,5 миллиард долларга кўп.
Агентлик қайд этишича, шу пайтгача ҳеч ким бунчалик тез бойимаган эди — бир йил ичида Tesla раҳбарининг бойлиги 165 миллиард долларга кўпайган. Таққослаш учун, бу Билл Гейтснинг умумий бойлиги миқдорига тенг. Маск Tesla акцияларининг кескин ўсиб бориши фонида бойимоқда, 2020 йилдаги ўсиш 743 фоизга тенг бўлди.
Шу билан бирга, Bloomberg эътибор қаратишича, Tesla 775 миллиард долларга (Facebook’дан қимматроқ) баҳоланмоқда, аммо бор-йўғи 500 мингга яқин автомобиль ишлаб чиқаради — бу Ford ва General Motors ҳажмларидан анча кам.
Шунингдек, агентлик қайд этишича, Маск капиталининг катта қисми унинг компанияси капитали билан боғлиқ. Тадбиркорнинг ўзи ҳам уни пуллар кам қизиқтиришини кўп бора айтиб ўтган ва ҳатто барча бойлигидан халос бўлишга ҳам ваъда берган эди. Дунёдаги энг бой одам деб тан олинганини билганидан кейин Tesla раҳбари Twitter’да «Жуда ғалати» ва «Ок, ишга қайтамиз» деб пост қолдирган.
Forbes Bloomberg’нинг ҳисоб-китобларига қўшилмайди, унга кўра, Маскнинг капитали 175,2 миллиард долларга тенг. Бу унинг сайёрада бадавлатликда учинчи ўринда турувчи франциялик магнат Бернар Арнодан 22 миллиард долларга бойроқ, аммо Безосдан 11 миллиард долларга камбағалроқ эканлигини англатади. Forbes ҳисоб-китобларига кўра, Безоснинг бойлиги 186,8 миллиард долларни ташкил этади.
Мавзуга доир:
- Илон Маск дунёдаги энг бой одамга айланди
- Илон Маскнинг бойлиги 150 млрд доллардан ошди
- Forbes Маскнинг дунёдаги энг бой одамлар рўйхатидаги ўрни бўйича Bloomberg билан баҳслашди
- Илон Маск миллиардерлар рейтингида Билл Гейтсдан ҳам ўзиб кетди
- Илон Маск миллиардерлар рейтингида Марк Цукербергни ортда қолдирди
Изоҳ (0)