Ilon Mask milliarderlar reytingida Bill Geytsdan ham o‘zib ketdi

SpaceX kosmik kompaniyasi asoschisi va Tesla bosh direktori Ilon Mask Bloomberg versiyasi bo‘yicha sayyoraning eng boy kishilari reytingida ikkinchi o‘ringa ko‘tarildi, deb yozadi “RBK”.

Agentlik Maskning boyligini 127,9 milliard dollarga baholamoqda. Bir yil ichida u 100,3 milliard dollarga ko‘paygan — bu reyting ishtirokchilari ichida eng katta o‘sishdir.

Milliarder reytingda boyligi 127,7 milliard dollarga baholanayotgan Bill Geytsdan o‘zib ketdi. Birinchi o‘rinda esa hamon katta farq bilan Amazon korporatsiyasi rahbari Jeff Bezos turibdi (182 milliard dollar).

Forbes’ning milliarderlar reytingida Mask to‘rtinchi o‘rinni egallamoqda (110,4 milliard dollar). Jurnal versiyasi bo‘yicha dunyoning eng badavlat odamlari uchligiga Bezos (181,3 milliard dollar), Louis Vuitton Moët Hennessy rahbari Bernar Arno (140,4 milliard dollar) va Geyts (118,5 milliard dollar) kiradi.

Avvalroq Ilon Mask Bloomberg’ning milliarderlar global reytingida uchinchi o‘ringa chiqib olib, Mark Sukerbergdan o‘zib ketgan edi.

Tesla ketma-ket besh chorakdan buyon serdaromad kompaniya sifatida yetakchilik qilmoqda. O‘tgan hafta S&P Dow Indices 21-dekabr kuni elektromobillar ishlab chiqaruvchining aksiyalari S&P 500 indeksiga kirishini e’lon qildi. Ushbu yangilik fonida to‘rt savdo kuni ichida Tesla aksiyalari 20 foizga qimmatlashdi, bir yil ichida esa ular 485 foizga oshdi. 23-noyabr kungi savdolar yopilishi vaqtiga kelib, kompaniya qimmatli qog‘ozlari 6,58 foizga qimmatlashib, bitta aksiyaning narxi 521,85 dollarga yetdi.

Shuningdek, Ilon Maskning boyligi bir hafta davomida 13,5 milliard dollarga o‘sgani haqida ham xabar berildi.