АҚШда Дональд Трампни истеъфога чиқишга чақирувчи даъватлар кучайди

АҚШда Дональд Трампнинг муддати расман якунланишидан икки ҳафта аввал президент лавозимидан кетиб, ваколатларни Жо Байденга топшириши ҳақидаги даъватлар кучайди, деб ёзади The New York Times.

6 январь куни Трампнинг тарафдорлари АҚШ Конгресси сайлов натижаларини тасдиқлаб, Жо Байденнинг ғалабасини расман тасдиқлаши керак бўлган Капитолий биносини шиддатли ҳужум билан эгаллаб олди. Сайловчилар ҳайъати аъзоларининг овозларини ҳисоблаш жараёни тўхтатилиб, 7 январь куни эрталаб давом эттирилди. Тартибсизликлар оқибатида беш киши ҳалок бўлди, ўнлаб полициячилар яраланди.

Вазият тинчлангач, Конгрессдаги Демократик партия вакиллари ва баъзи республикачилар амалдаги вице-президент Майк Пенсни Конституцияга киритилган 25-тузатишга мувофиқ, Дональд Трампни ҳокимиятдан четлатишга даъват этди. Тузатиш 1967 йилда қабул қилинган бўлиб, президентнинг ўз ваколатларини бажаришга лаёқати бўлмаганида, унинг ўрнини босиш тартибини белгилайди.

The New York Times маълумотларига кўра, Пенс ушбу чорага қарши чиқади. Уни Трамп маъмуриятидаги бир қатор мансабдорлар қўллаб-қувватлайди. Уларнинг фикрича, Трампнинг муддатидан илгари истеъфога чиқиши Вашингтондаги инқирозни ҳал қилишга ёрдам бергандан кўра кўпроқ уни чуқурлаштиради.

Вакиллар палатаси спикери Нэнси Пелоси агар Майк Пенс ва унинг маъмурияти 25-тузатишни амалда қўлламаса, унда демократлар яна бир импичмент жараёнини бошлашга тайёрлигини маълум қилди (2019 йил декабрида конгрессменлар Трампни ваколатларини суиистеъмол қилишда айблаган эди, аммо президент оқланган эди).

Дональд Трампнинг тарафдори сифатида машҳур бўлган Руперт Мёрдокнинг медиа-империясига кирувчи The Wall Street Journal ҳам Трампга истеъфо бериш даъвати билан мурожаат қилди. Газетада чоп этилган мақолада президент «сайловлардан кейин ҳокимиятни топшириш бўйича конституциявий жараёнга тажовуз қилгани» учун танқид қилинди, унинг хатти-ҳаракатлари эса «қонунга хилоф» деб аталди. Мёрдокка тегишли яна бир нашр The New York Post ўз таҳририят мақоласида Трампнинг ёрдамчиларини «қолиб, ушбу жинниликни тўхтатишга» чақирди.

Трамп маъмуриятидаги баъзи мансабдорлар Капитолийга қилинган ҳужумдан кейин истеъфога чиқиши ҳақида эълон қилди. Улар орасида таълим вазири Бетси Девос, транспорт вазири Элейн Чао, Шимолий Ирландия бўйича АҚШ махсус элчиси ва президент маъмурияти собиқ раҳбари Мик Малвейни, президентнинг миллий хавфсизлик масалалари бўйича маслаҳатчиси ўринбосари Мэттью Поттингер, биринчи хоним маъмурияти раҳбари Стефани Гришэм ва бошқалар бор.

Дональд Трампнинг ўзи 7 январь куни видеомурожаат эълон қилиб, «янги маъмурият» 20 январь куни қасамёд қилишини айтиб, «президент сифатида хизмат қилиш у учун бир умрлик шараф» бўлганини таъкидлади. «Капитолийга бостириб кирган намойишчилар Америка демократияси тахтини таҳқирлади», — деб айтди. Аввалроқ эса президент Капитолий ҳужумга учраган вақтда ўз тарафдорларига қарата эълон қилган видеода уларни «уйига кетиш»га чақирган ва «Мен сизларни яхши кўраман», — деган эди.

CNN президент маслаҳатчисига таяниб ёзишича, Трамп унинг президентлигига муддатидан илгари истеъфо ва потенциал импичмент хавф солаётгани учунгина видеони эълон қилган.