Snapchat ижтимоий тармоғи Вашингтондаги Капитолий биноси шиддатли ҳужумга учрагач, АҚШ президенти Дональд Трампнинг аккаунтини блоклаб қўйди, деб ёзади «РБК».
«Чоршанба куни (6 январь) президент Трампнинг Snapchat аккаунтини блоклаб қўйганимизни тасдиқлашимиз мумкин», — дея маълум қилишди Snapchat’дан.
Компанияда аниқлик киритишларича, улар Трампнинг қуруқ гапларидан ва демократик институтларга ҳужумлардан хавотирда.
Шунингдек, Amazon компаниясига тегишли Twitch стриминг платформаси ҳам Трампнинг аккаунтини блоклаб қўйди. Платформа матбуот котиби Axios порталига берган интервьюсида айтишича, бу қарор Америка жамоатчилигини Twitch’дан зўравонликни янада авж олдириш мақсадида фойдаланишдан ҳимоя қилиш учун қабул қилинган.
Аввалроқ Facebook асосчиси Марк Цукерберг Дональд Трамп яқин икки ҳафта давомида, яъни президентлик лавозими тугагунга қадар Facebook ва Instagram’да блокланишини маълум қилган эди.
Эслатиб ўтамиз, АҚШда 3 ноябрь куни бўлиб ўтган президент сайловлари натижаларини сайловчилар ҳайъати 15 декабрь куни қўллаб-қувватлаб, демократлардан номзод Жо Байденни ғолиб деб эълон қилди. Конгресс якунларни 6 январь куни тасдиқлаши керак эди. Бунга сайловда мағлуб бўлган президент Дональд Трампнинг тарафдорлари халақит берди: улар Конгресс биноси ёнида йиғилиб, ичкарига бостириб кирди. Полиция уларни фақат куч билан қувиб чиқара олди.
Конгрессменларнинг бир қисми Капитолийдан эвакуация қилинди. Вашингтонда комендантлик соати эълон қилиниб, тартибни сақлаш учун АҚШ пойтахтига Миллий гвардия кучлари киритилди. Тўқнашувларда тўрт киши ҳалок бўлгани айтилмоқда.
Кейинроқ, 7 январь куни АҚШ Конгресси мажлисини давом эттириб, Жо Байденнинг АҚШнинг 46-президенти этиб сайланганини тасдиқлади ва унинг инаугурациясини 20 январга белгилади.
Изоҳ (0)